चलचित्र घरमा १७ करोडको क्षति, हलहरू तत्काल नखुल्ने

News Summary

Generated by OK AI. Editorially reviewed.

चलचित्र संघले जेनजी आन्दोलनका क्रममा देशभरका चलचित्र घरमा १७ करोड रुपैयाँ बराबरको क्षति भएको जनाएको छ।
भाटभटेनीस्थित क्यूएफएक्स हलमा १५ करोड रुपैयाँ बराबरको क्षति पुगेको छ र भवन पूर्णरुपमा जलेको छ।
संघका महासचिव सुरेन्द्र थापाले केही दिन हल खुल्ने छैनन् र पुनः बैठक बसेर निर्णय गर्ने बताउनुभयो।

काठमाडौं । चलचित्र संघले जेनजी आन्दोलनका क्रममा देशभरका चलचित्र घरमा पुगेको क्षतिको विवरण संकलन गरेको छ ।

शनिबार बसेको संघको बैठकले ४ हलमा भएको आगजनी र तोडफोडबाट १७ करोड रुपैयाँ बराबरको क्षति भएको जनाएको हो ।

धेरै क्षति बिराटनगरस्थित भाटभटेनीमा रहेको क्यूएफएक्सलाई पुगेको छ । भवन पूर्णरुपमा जलेको छ । त्यहाँभित्र रहेको हललाई मात्र १५ करोड रुपैयाँको क्षति पुगेको छ ।

गोंगबुस्थित ल्होत्से मलको भुइँतलामा रहेको आइएनआईको मल्टिप्लेक्सको टिकट काउन्टरको बुथमा गरिएको आगजनी र तोडफोडले क्षति पुगेको छ । आगजनीले ६ तलामाथि रहेको हलको उपकरणमा असर परेको छ ।

क्यूएफएक्सको भक्तपुर र बुटवलका हलको बाहिर रहेका टिकट काउन्टर पनि पूर्णरुपमा क्षतिग्रस्त भएको छ । ‘कूल १७ करोड बराबरको क्षति पुगेको छ’ चलचित्र संघका महासचिव तथा प्रवक्ता सुरेन्द्र थापाले भने ।

उनका अनुसार, केही दिन अझै हल खुल्नेछैन । ‘अवस्था अझै संवेदनशिल भएकाले तत्काल हल खुल्नेछैनन्’ उनले भने । हल कहिले खोल्नेबारे निर्णय गर्न संघको बैठक केही दिनमा पुनः बस्नेछ ।

अहिले मुलुकभर १६५ फिल्म हल छन् ।