नेपाललाई विपद् प्रतिकार्यमा थप सहयोग गर्न संयुक्त राष्ट्र संघ तयार

२४ असोज, काठमाडौं । राष्ट्रिय विपद् जोखिम न्यूनीकरण तथा व्यवस्थापन प्राधिकरणका कार्यकारी प्रमुख इन्जिनियर दिनेशप्रसाद भट्ट र संयुक्त राष्ट्र संघीय आवासीय संयोजक हाना सिंगर हाम्डीबीच भेटवार्ता भएको छ ।

शुक्रबार अपराह्न सिंहदरबारस्थित प्राधिकरणको कार्यालयमा शिष्टाचार भेट भएको हो ।

भेटवार्तामा पछिल्लो मनसुनी विपद्पश्चातको राहत तथा सुरुवाती पुनर्स्थापनाबारे छलफल भएको छ ।

भेटवार्तामा कार्यकारी प्रमुख भट्टले पछिल्लो मनसुनी विपद्‍बाट खासगरी इलाममा भएको जनधनको क्षतिबारे जानकारी गराउँदै हाल भइरहेको राहत तथा पुनर्स्थापनाका भइरहेको पहलबारे जानकारी गराएका थिए ।

त्यसक्रममा, कार्यकारी प्रमुख भट्टले भारीदेखि अति भारी वर्षाको प्रक्षेपण प्राप्त भएपश्चात जनधनको क्षति कम गर्न भएका पूर्वसूचना, पूर्वकार्य र प्रतिकार्य पहलबारे पनि जानकारी गराएका थिए ।

उनले बाढीले परेको प्रभावबारे जानकारी लिएको र आफूले गर्नसक्ने सहयोग गर्न तयार रहेको बताएको जानकारी दिए ।

राष्ट्र संघीय आवासीय संयोजक हाम्डीले सबैभन्दा धेरै प्रभावित भएको इलाममा खाद्य एवं गैरखाद्य राहत, खानेपानी तथा सरसफाइ सम्बन्धी सहयोग र पुनर्स्थापनाका लागि संयुक्त राष्ट्रसंघीय निकायले तत्काल उपलब्ध गराउनसक्ने सहयोगबारे जानकारी गराएको प्राधिकरणले जनाएको छ ।