पर्यटकले नेपालमा गर्ने खर्चको दाँजोमा विदेश घुम्ने नेपालीको खर्च धेरै

News Summary

Generated by OK AI. Editorially reviewed.

नेपाल राष्ट्र बैंकका अनुसार भदौसम्म नेपालको भ्रमण आय ११ अर्ब ५८ करोड रुपैयाँ छ भने भ्रमण व्यय ४७ अर्ब ३१ करोड रुपैयाँ पुगेको छ।
भ्रमण व्ययमा शिक्षाका लागि ३२ अर्ब ७६ करोड रुपैयाँ खर्च भएको छ र शिक्षातर्फको खर्च घटाउँदा विदेश घुमफिरमा १४ अर्ब ५५ करोड रुपैयाँ खर्च भएको देखिन्छ।
भदौसम्म खुद सेवा आय ३१ अर्ब १६ करोड रुपैयाँ घाटामा रहेको छ जुन गत आवको २७ अर्ब ९३ करोड रुपैयाँ घाटाभन्दा बढी हो।

२८ असोज, काठमाडौं । नेपाल आउने विदेशी पर्यटकले नेपालमा गर्ने खर्चको दाँजोमा नेपालीले विदेश घुमफिरमा धेरै खर्च गरेको पाइएको छ ।

नेपाल राष्ट्र बैंकका अनुसार भदौसम्म नेपालको भ्रमण आय ११ अर्ब ५८ करोड रुपैयाँ बराबर छ । सोही अवधिमा भ्रमण व्यय भने ४७ अर्ब ३१ करोड रुपैयाँ छ । यसमध्ये शिक्षाका लागि ३२ अर्ब ७६ करोड रुपैयाँ विदेशिएको छ ।

कुल भ्रमण व्ययबाट शिक्षातर्फको खर्च घटाउँदा नेपालीले विदेश घुमफिरमा गरेको खर्च धेरै देखिन्छ । यस्तो रकम १४ अर्ब ५५ करोड रुपैयाँ छ । भदौसम्म भ्रमण आय ९.८ प्रतिशतले बढे पनि त्यो रकम नेपालीले विदेशमा गर्ने खर्चको तुलनामा भने कम छ । अघिल्लो वर्ष भदौसम्म पर्यटकबाट हुने आम्दानी १० अर्ब ५५ करोड रुपैयाँ थियो ।

यस वर्ष भदौसम्म भ्रमण व्यय ९.६ प्रतिशत बढेको छ । अघिल्लो वर्ष शिक्षा र घुमफिरमा जाने नेपालीले ४३ अर्ब १८ करोड रुपैयाँ विदेश लगेका थिए । गत वर्ष शिक्षामा २८ अर्ब २० करोड विदेशिएको थियो ।

नेपाल आउने रकमभन्दा विदेशिने रकम धेरै हुँदा भदौसम्म खुद सेवा आय भने ३१ अर्ब १६ करोडले घाटामा रहेको देखिन्छ । गत आव सोही अवधिमा खुद सेवा आय २७ अर्ब ९३ करोड घाटामा थियो ।