एमाले सचिवालय बैठक भोलि, मुख्य एजेन्डा- महाधिवेशनको क्यालेण्डर र जनपरिचालन

१४ कात्तिक, काठमाडौं । नेकपा एमालेको सचिवालय बैठक भोलि बिहान ११ बजे बोलाइएको छ ।

अध्यक्ष केपी शर्मा ओलीको अस्थायी निवास गुन्डुमा बस्ने सचिवालय बैठकले महाधिवेशनको तयारी र जनचालनबारे निर्णय गर्ने प्रचार विभाग प्रमुख राजेन्द्र गौतमले बताए ।

‘एमाले अब महाधिवेशनमा होमिएको छ । यो सचिवालय बैठकले गर्ने मुख्य एजेण्डा महाधिवेशनको क्यालेण्डर निर्माण हो,’ उनले भने ।

असोज अन्तिम साता बसेको केन्द्रीय कमिटी बैठकले २७–२९ मंसिरमा एघारौं महाधिवेशन पोखरामा गर्ने निर्णय गरेको छ । उक्त महाधिवेशनमा सहभागी हुने प्रतिनिधिहरुको छनोटको मिति, अनुपात, संख्या र आधारबारे यो सचिवालय बैठकले निर्णय गर्ने गौतमले बताए ।

‘पहिले एक हजार पार्टी सदस्य बराबर ३ जना प्रतिनिधि छनोट गर्ने मापदण्ड अपनाइएको थियो । यसपटक १२ सय सदस्य बराबर ३ जना प्रतिनिधि छनोट गर्ने सल्लाह भइरहेको छ,’ गौतमले भने ।

पार्टी सदस्य संख्या बढेकाले अनुपात बढाउनु परेको उनले बताए । गौतमका अनुसार एमालेमा ६ लाख ६३ हजार पार्टी सदस्य कायम भएको छ ।

जनसंगठन, विभाग, केन्द्रीय कार्यालय, प्रवास र आयोजक गरी २२ सयको हाराहारीमा प्रतिनिधि चयन हुनसक्ने अनुमान गरिएको छ । तर, यसबारे निर्णय सचिवालय बैठकले गर्ने स्थायी कमिटी सदस्य गौतमले बताए ।

सचिवालय बैठकको अर्को एजेण्डा जनपरिचालन हुने पनि उनले बताए । ‘पार्टीले प्रतिनिधि सभा पुनर्स्थापना भनेको छ । त्यसैले यो बैठकले जनपरिचालनको कार्ययोजना ल्याउछ,’ गौतमले भने ।