अफगानिस्तानले भन्यो- पाकिस्तानी आक्रमणको सही समयमा जवाफ दिन्छौं

News Summary

Generated by OK AI. Editorially reviewed.

अफगानिस्तानका तालिबान प्रवक्ता जबीहुल्लाह मुजाहिदले पाकिस्तानले गएराति पकतीका, खोस्त र कुनार प्रान्तमा हवाई आक्रमण गरेको आरोप लगाएका छन्।
मुजाहिदले भने, पाकिस्तानी सेनाले अन्तर्राष्ट्रिय नियम उल्लघंन गर्दै अफगानिस्तानको सम्प्रभुतामा सिधा आक्रमण गर्यो।
पाकिस्तानको आक्रमणमा खोस्त प्रान्तमा एक घरमा बम पड्किँदा १० जना बालबालिका र महिलाको मृत्यु भएको तालिबानले जनाएको छ।

९ मंसिर, काठमाडौं । पाकिस्तानले आफ्नो सम्प्रभुतामा आक्रमण गरेको अफगानिस्तानले आरोप लगाएको छ ।

अफगानिस्तानको तालिबान सरकारका प्रवक्ता जबीहुल्लाह मुजाहिदले गएराति पाकिस्तानले आफ्ना विभिन्न क्षेत्रमा हवाई आक्रमण गरेर अन्तर्राष्ट्रिय नियम उल्लघंन गरेको बताए ।

सामाजिक सञ्जाल एक्स (ट्विटर) मा पोस्ट गर्दै तालिबान प्रवक्ता मुजाहिदले भने, ‘पाकिस्तानी सेनाले गएराति पकतीका, खोस्त र कुनार प्रान्तमा हवाई आक्रमण गर्‍यो , जुन अफगानिस्तानको सम्प्रभुतामाथिको सिधा आक्रमण हो, पाकिस्तानी अधिकारीले अन्तर्राष्ट्रिय नियमको उल्लघंन गरे ।’

पाकिस्तानी सेनाले गरेको दुश्मनीपूर्ण कारबाहीले केही हासिल नहुने तालिबान सरकारका प्रवक्ता मुजाहिदको भनाइ छ ।

गलत गुप्तचरीय दलले चलाएको सैन्य कारबाहीले तनाव बढाउने भन्दै मुजाहिदलेले यसले पाकिस्तानी सैन्य बलको असफलता सार्वजनिक गर्ने बताए ।

उनले भने, ‘अफगानिस्तान यस उल्लघंन र आक्रमणको कडा निन्दा गर्दछ, आफ्नो हवाई सीमा, जमिन र नागरिकको रक्षा आफ्नो अधिकार भएको कुरामा जोड दिन्छ र सही समयमा अवश्य जवाफ दिनेछ ।’

तालिबान सरकारका प्रवक्ता मुजाहिदले पाकिस्तानले खोस्त प्रान्तमा एक घरमा बम आक्रमण गरेको आरोप लगाएका छन्, आक्रमणमा १० जना बालबालिका र महिलाको मृत्यु भएको छ ।

पाकिस्तानले भने अहिलेसम्म तालिबान सरकारका प्रवक्ताको आरोपबारे कुनै प्रतिक्रिया दिएको छैन ।