एम्बुलेन्स चालकलाई स्वास्थ्य मन्त्रालयको चेतावनी : बिरामीलाई महँगा अस्पताल लगे कारबाही

News Summary

Generated by OK AI. Editorially reviewed.

स्वास्थ्य तथा जनसंख्या मन्त्रालयले आर्थिक प्रलोभनमा परी बिरामीलाई महंगा अस्पतालमा नलैजान एम्बुलेन्स चालकहरूलाई आग्रह गरेको छ।
मन्त्रालयले बिरामीको इच्छाविपरीत निजी तथा महँगा अस्पतालमा लैजाने गतिविधि रोक्न सूचना जारी गरेको छ।
एम्बुलेन्स चालकले आर्थिक लाभका लागि यस्तो कार्य गरे कारबाही गरिने चेतावनी मन्त्रालयले दिएको छ।

९ पुस, काठमाडौं । आर्थिक प्रलोभनमा परी बिरामीलाई महंगा अस्पतालमा नलैजान स्वास्थ्य तथा जनसंख्या मन्त्रालयले एम्बुलेन्स चालकहरूलाई आग्रह गरेको छ । बिरामी तथा घाइतेको इच्छाविपरीत एम्बुलेन्स चालकले निजी तथा महँगा अस्पतालहरूमा बिरामी लैजाने गरेको गुनासो आउने गरेको स्वास्थ्य मन्त्रालयले जनाएको छ ।

बुधबार सूचना जारी गरी एम्बुलेन्स सेवा निर्देशिका विपरीत हुने यस खालका गतिविधि रोक्न मन्त्रालयले आग्रह गरेको छ । ‘अप्ठ्यारो अवस्थामा परेका बिरामी वा घाइतेहरूलाई सहयोग गर्नुको साटो उनीहरूबाट अवाञ्छित आर्थिक लाभ लिनु अत्यन्तै दुःखद कार्य हो’ सूचनामा भनिएको छ । अघिल्ला अस्पतालले रेफर गरेको र बिरामीले चाहेकै स्वास्थ्य संस्थामा अनिवार्य लैजान एम्बुलेन्स चालकहरूलाई आग्रह गरिएको छ ।

एम्बुलेन्स चालकले आर्थिक लाभका लागि यस खालका कार्य गरेको पाइएमा कानुनबमोजिम कारबाही गरिने चेतावनी दिइएको छ ।