बाजुराका ८ स्थानबाट निर्वाचन प्रहरीलाई तालिम

फाइल तस्वीर

१८ माघ, बाजुरा । बाजुराका लागि छनोट भएका निर्वाचन प्रहरीलाई जिल्लाका ८ स्थानबाट तालिम दिइने भएको छ ।

२१ फागुनमा हुने प्रतिनिधिसभा सदस्य निर्वाचनका लागि छनोट भएका निर्वाचन प्रहरीहरूलाई ८ स्थानबाट आइतबारदेखि तालिमको व्यस्था मिलाइएको बाजुराका प्रहरी प्रमुख प्रहरी नायव उपरीक्षक इकवाल हवारीले जानकारी दिए ।

हवारीका अनुसार ९ सय ६४ जना निर्वाचन प्रहरीका लागि जिल्लाका ८ स्थानबाट तालिम दिइने व्यवस्था मिलाइएको हो ।

उनका अनुसार जिल्ला प्रहरी कार्यालय बाजुरा मार्तडीमा ४ सय ४४, इलाका प्रहरी कार्यालय बुढीनन्दामा ९९, इलाका प्रहरी स्वामीकार्तिकमा ९५, गौमुलमा ५१, प्रहरी चौकी बार्जुगार्डमा एक सय ४, टाँटेमा ७९, मौरेमा ३५ र अस्थायी प्रहरी पोष्ट आटीचौरमा ५७ जनालाई तालिम दिने व्यवस्था मिलाइएको छ ।

त्यस्तै सशस्त्र प्रहरी बल गुल्म बाजुरामा आवेदन दिएर उत्तीर्ण भएका ९६ जना उम्मेदवारलाई पनि सशस्त्र प्रहरीले सदरमुकाम मार्तडीमै तालिम दिने जनाएको छ ।

निर्वाचनलाई स्वच्छ, निष्पक्ष तथा भयरहीत वातावरणमा सम्पन्न गर्ने प्रयोजनका लागि बाजुरामा एक हजार ६० जना निर्वाचन प्रहरी भर्ना गरिएको छ ।