‘कमेडी नाइट विथ च्याम्पियन्स’ का ५ एपिसोड अस्ट्रेलियाबाट ‘लाइभ’ हुने

काठमाडौं । लोकप्रिय टिभी कार्यक्रम ‘कमेडी नाइट विथ च्याम्पियन्स’ का कम्तीमा ५ एपिसोड अस्ट्रेलियाबाट ‘लाइभ’ हुने भएका छन् । निर्माताले आउँदो बैशाखदेखि दशैंसम्म विभिन्न अस्ट्रेलियाली सहरबाट ती एपिसोड प्रसारण हुने बताएका छन् ।

निर्माता तथा निर्देशक विशाल भण्डारीका अनुसार कम्तीमा ५ देखि अधिकतम ७ वटा एपिसोड उतैबाट प्रसारण हुने गरि एक कम्पनीसँग लिखित सहमति भएको छ । ‘विभिन्न कारणले अहिल्यै उक्त आयोजक संस्थाको नाम खुलाउन मिल्दैन । चाँडै यसबारे पनि जानकारी दिन्छौं’ भण्डारीले भने ।

चाँडै आयोजना स्थल र मितिको घोषणा हुने उनले जनाए । हिमालय टिभीबाट प्रसारण हुँदै यो कार्यक्रमका अहिलेसम्म ४४ एपिसोड प्रसारण भैसकेका छन् ।

भेन्यू तय भएका ठाउँमा नेपालको जस्तै भब्य सेट निर्माण हुने, त्यही छायांकन गरेर प्रसारण गर्ने तयारी छ । स्याटेलाइट उपलब्ध हुने ठाउँमा भने सिधै प्रसारण हुने भण्डारीले अनलाइनखबरलाई जानकारी दिए ।

उनका अनुसार भब्य तरिकाले कार्यक्रम गर्नुपर्ने भएकाले नेपालको जस्तै सेट बनाउन समय लाग्ने र ठूलै पैसा खर्च हुने बताइएको छ ।

‘कमेडी नाइट विथ च्याम्पियन्स लाइभ फ्रम अस्ट्रेलिया’ नाम राखिएको शोका लागि नेपालका कार्यक्रमसँग सम्बद्ध ३५ जनाको टिम अस्ट्रेलिया जानेछन् ।

‘त्यताबाट दर्शकको उच्च माग भएकाले हामीले इभेन्टको रुपमा अस्ट्रेलियामा कार्यक्रम गर्न लागेका हौं’ भण्डारीले भने, ‘दर्शकको इच्छा पनि धेरै देखिएको छ ।’ उनका अनुसार, लाइभ दर्शकको टिकट बिक्री भने चाँडै खुलाउने तयारी छ ।

यसअघि द भ्वाइस अफ नेपाल र नेपाल आइडलले रियालिटी शोको संरचनाको खाडी मुलुक कतारमा यस्तो कार्यक्रम गरिसकेका छन् । तर, ५ भन्दा धेरै एपिसोड छायांकन अर्थात लाइभ भएर आउन लागेको यो पहिलोपटक हुने बताइएको छ । कमेडी कार्यक्रम ‘कमेडी नाइट विथ च्याम्पियन्स’ प्रत्येक मंगलबार हिमालय टिभीबाट प्रसारण हुने गर्छ ।