सङ्खुवासभामा रास्वपा : प्रत्यक्षमा पराजित, समानुपातिकमा पहिलो

२७ फागुन, सङ्खुवासभा । सङ्खुवासभामा प्रतिनिधिसभा सदस्य निर्वाचनको समानुपातिकतर्फको मतगणना बुधबार सकिएको छ ।

प्रतिनिधिसभा निर्वाचनअन्तर्गत समानुपातिकतर्फ सङ्खुवासभामा राष्ट्रिय स्वतन्त्र पार्टी (रास्वपा) पहिलो दल बनेको छ । प्रत्यक्षतर्फ नजिते पनिसमानुपातिकतर्फ राष्ट्रिय स्वतन्त्र पार्टी (रास्वपा) ले सबैभन्दा धेरै मत प्राप्त गरेको छ ।

बुधबार बिहान घोषित समानुपातकितर्फको अन्तिम मत परिणामअनुसार राष्ट्रिय स्वतन्त्र पार्टी (रास्वपा)  सबैभन्दा बढी मत पाएको हो । प्रतिनिधिसभा सदस्य प्रत्यक्षतर्फ जितेको नेकपा एमाले दोस्रो भएको छ ।

१ लाख २१ हजार २७ मतदाता रहेको सङ्खुवासभामा समानुपातकितर्फ ६३ हजार ४ सय २ मत खसेको थियो  । अन्तिम मत परिणाममा रास्वपाले समानुपातिकतर्फ १५ हजार ३ सय ४३ मत प्राप्त गरेको छ । रास्वपाले प्रत्ययक्षतर्फ १५ हजार मत प्राप्त गरेको थियो । २०७९ सालको निर्वाचनमा रास्वपा यस जिल्लामा चौथो स्थानमा रहेको थियो ।

तर, यसपटकको निर्वाचनमा उल्लेख्य मतसहित पहिलो स्थानमा उक्लिंदै जिल्लाको राजनीतिक समीकरणमा ठूलो परिवर्तन देखिएको छ ।  त्यस्तैगरी नेकपा एमाले १३ हजार ९ सय १४,नेपाली कांग्रेसले १२ हजार १ सय ६४,श्रम संस्कृति पार्टीले १२ हजार ३९ मत र नेपाली कम्युनिष्ट पार्टी (नेकपा) ले २ हजार ६ सय ४६ मत प्राप्त गरेको मुख्य निर्वाचन अधिकृत राजकुमार कोइरालाले बताए ।

प्रत्यक्षतर्फ देशभरका १६५ वटा निर्वाचन क्षेत्रमध्ये सबैभन्दा अन्तिममा सङ्खुवासभाको मतगणनाको नतिजा सोमबार राति मात्र आएको थियो ।

जिल्लाको उत्तरी क्षेत्र भोटखोला चीनसँग सिमाना जोडिएको भोटखोला गाउँपालिका क्षेत्रको मतपेटिका खराब मौसमका कारण नेपाली सेनाको हेलिकोप्टरले समयमा सङ्कलन गर्न नसकेपछि तीनपछि मात्र मतगणना गरिएको थियो ।

प्रतिनिधिसभा समानुपातिक तर्फ २ हजार ७ सय ३४ मत बदर भएको मुख्य निर्वाचन अधिकृतको कार्यालयले जनाएको छ । सङ्खुवासभामा समानुपातिकतर्फ प्रतिनिधिसभामा ५७ दलको सहभागिता रहेको थियो । प्रतिनिधिसभा प्रत्यक्ष निर्वाचनतर्फ एमालेका अर्जुन कार्की निर्वाचित भएका छन् ।

प्रतिनिधिसभा प्रत्यक्ष १ लाख १९ हजार ६ सय ३०  मतदाता रहेको सङ्खुवासभामा ६३ हजार ६ सय ३४ मत खसेको थियो । प्रतिनिधिसभा सदस्य निर्वाचनमा एक स्वतन्त्र सहित १६ जना चुनावी मैदानमा रहेका थिए ।