समानुपातिकमा नौ लाख मत गयो खेर, थ्रेसहोल्ड नकटाउने कुन दलको मत कति ?

News Summary

Generated by OK AI. Editorially reviewed.

प्रतिनिधिसभा सदस्य निर्वाचनको समानुपातिक तर्फ ८ लाख ९० हजार ७८६ मत खेर गएको छ जुन थ्रेसहोल्ड नकटाउने दलहरूको कुल मत हो।
समानुपातिकमा तीन प्रतिशत कटाउने दलका उम्मेदवार मात्र विजय हुने व्यवस्था छ र यसपटक १ करोड ८ लाख ३५ हजार २७ मत खसेको थियो।
राष्ट्रिय स्वतन्त्र पार्टी, नेपाली कांग्रेस, नेकपा एमाले, नेपाली कम्युनिष्ट पार्टी, श्रम संस्कृति पार्टी र राष्ट्रिय प्रजातन्त्र पार्टीले समानुपातिक तर्फ आफ्ना उम्मेदवार जिताउन सफल भएका छन्।

२८ फागुन, काठमाडौं । प्रतिनिधिसभा सदस्य निर्वाचनको समानुपातिक तर्फ ८ लाख ९० हजार ७८६ मत खेर गएको छ । यो थ्रेसहोल्ड नकटाउने दलहरूको कुल मत हो ।

समानुपातिकमा तीन प्रतिशत कटाउने दलका उम्मेदवार मात्र विजय हुने व्यवस्था छ । यसपटक १ करोड ८ लाख ३५ हजार २७ मत खसेको थियो ।

२१ फागुनमा भएको मतदानबाट राष्ट्रिय स्वतन्त्र पार्टी (रास्वपा), नेपाली कांग्रेस, नेकपा एमाले, नेपाली कम्युनिष्ट पार्टी, श्रम संस्कृति पार्टी र राष्ट्रिय प्रजातन्त्र पार्टीले समानुपातिक तर्फ आफ्ना उम्मेदवार जिताउन सफल भए ।

समानुपातिकमा रास्वपाले सबैभन्दा बढी मत ल्याउँदा सबैभन्दा कम मत ल्याउने कीर्तिमानी त्रिमुल नेपाल पार्टीले राख्यो । रास्वपाले ५१ लाख ८३ हजार ४९३ मत र त्रिमुल नेपालले देशभरीबाट ६९४ मत प्राप्त गर्‍यो । चुनाव चिह्न ओदान भएको त्रिमुल नेपालको अध्यक्ष भरतमणि दाहाल छन् ।

थ्रेसहोल्ड कटाउन नसक्नेमा उपेन्द्र यादव नेतृत्वको जनता समाजवादी पार्टी (जसपा) नेपाल, कुलमान घिसिङको पार्टीले समर्थन गरेको राष्ट्रिय स्वतन्त्र पार्टी (रापपा), डा.सीके राउतको जनमत पार्टी, नारायणमान विजुक्छेको नेपाल मजदुर किसान पार्टी, चिक्रबहादुर केसीको राष्ट्रिय जनमोर्चा लगायत छन् ।

त्यस्तै, एकल चुनाव चिह्न चकिया (जाँतो)बाट लडेको राजेन्द्र महतोका राष्ट्रिय मुत्ति पार्टी (रामुपा) नेपाल, अशोक राईको जसपा र रेशम चौधरीको नागरिक उन्मुक्ति पार्टी (नाउपा), नेपालले पनि थ्रेस होल्ड कटाउन सकेन ।

पूर्व प्रधानमन्त्री बाबुराम भट्टराई र पूर्वमन्त्री जनार्दन शर्माको प्रगतिशील लोकतान्त्रिक पार्टी, नेत्रवित्रम चन्दको नेकपा (माओवादी), एकल चुनाव चिह्न मोवाइल लिएर लडेको प्रभु साहको आम जनता पार्टी, एकल चिह्न बस लिएको पूर्व गृह राज्यमन्त्री मोहम्मद रिजवान अन्सारीको नेपाल संघीय समाजवादी पार्टी (नेसंसपा), सीपी मैनालीको नेकपा माले लगायतले ३० हजार भन्दा पनि कम मत ल्याए ।

थ्रेसहोल्ड कटाउन नसकेका दलहरूलाई प्राप्त मतः

जसपा, नेपाल १,८२,२८५

राष्ट्रिय परिवर्तन पार्टी १,७२,४९३

जनमत पार्टी ७९,४३५

चकिया (जाँतो) (रामुपा/जसपा/नाउपा, नेपाल) ६२,०६९

नेपाल मजदुर किसान पार्टी ४२,३०१

राष्ट्र निर्माण दल नेपाल ३९,५७७

राष्ट्रिय जनमोर्चा २९,४५५

एकल चिन्ह बस (नेसंसपा/बएपार्टी/नेजजापा) २९,४३६

नेपाल जनता संरक्षण पार्टी २८,४२४

प्रगतिशील लोकतान्त्रिक पार्टी २४,६७५

नेकपा (माओवादी) २३,८६४

मंगोल नेशनल अर्गनाइजेशन २०,८२९