अमेरिकामा मूल्य प्रभावित गर्न कतारले ग्यास उत्पादन रोकेको हो ?

२९ फागुन, काठमाडौं । अमेरिकामा ऊर्जाको मूल्यलाई प्रभावित पार्न कतारले आफ्नो एलएनजी उत्पादन रोकेको भन्ने केही इजरायली मिडियाको दाबीलाई कतारले अस्वीकार गरेको छ।

अलजजिराका अनुसार, कतारले यस्ता आरोपहरूलाई कतार र अमेरिकाबीच फाटो ल्याउने प्रयासको संज्ञा दिएको छ ।

अलजजिराका अनुसार, बिहीबार एक विज्ञप्ति जारी गर्दै एक वरिष्ठ कतारी अधिकारीले भने, ‘कतारले राजनीतिक वा आर्थिक लाभभन्दा सधैं मानिसहरूको सुरक्षालाई प्राथमिकता दिनेछ।’

ती अधिकारीले भने, ‘(इजरायली) प्रधानमन्त्री नेतान्याहुका अनौपचारिक प्रवक्ताहरूले यस क्षेत्रभरि थप तनाव र विभाजन ल्याउन विश्वव्यापी अस्थिरताको यो अवधिको फाइदा उठाउन खोज्नु कुनै आश्चर्यको कुरा होइन।’

गत साता इरानी ड्रोन आक्रमणपछि कतार इनर्जीले तरल प्राकृतिक ग्यास (एलएनजी) को उत्पादन स्थगित गरेको थियो, जसले विश्वव्यापी एलएनजी बजारमा दबाब सिर्जना गरेको छ। कतारले विश्वको कुल २० प्रतिशत एलएनजी आपूर्ति गर्छ।

कतारको रक्षा मन्त्रालयका अनुसार, इरानी ड्रोनहरूले मेसाइद इन्डस्ट्रियल सिटीको पावर प्लान्टमा रहेको पानीको ट्याङ्की र विश्वको सबैभन्दा ठूलो एलएनजी उत्पादक कतार इनर्जीको स्वामित्वमा रहेको रास लाफानको ऊर्जा केन्द्र गरी दुईवटा साइटहरूमा आक्रमण गरेका थिए ।

ती अधिकारीले भने, ‘दुई वर्षभन्दा बढी समयदेखि, नेतान्याहुले आफ्नो राजनीतिक महत्त्वाकांक्षा पूरा गर्न एउटा यस्तो क्षेत्रीय एजेन्डालाई अघि बढाएका छन् जसले द्वन्द्व र अराजकतालाई बढावा दिएको छ।’

उनले इजरायली च्यानल एन१२न्यूजका प्रमुख राजनीतिक विश्लेषक अमित सेगलले एक्समा पोस्ट गरेको भनाइलाई उद्धृत गरेका छन् । सेगलले बुधबार ग्यास उत्पादन रोकिनुलाई ‘युद्ध अन्त्य गर्न दबाब दिने उद्देश्यले ग्यास केन्द्र बन्द गर्न इरान र कतारबीचको समन्वय’ को संकेत भएको बताएका थिए।

सेगलका दाबीहरूले ‘ऊर्जा उत्पादन रोक्ने कतारको निर्णय एउटा सुनियोजित राजनीतिक कदम भएको आरोप लगाएर अमेरिका र कतारबीच फाटो ल्याउने’ प्रयास गरेको ती कतारी अधिकारीले बताए।

‘कतारले इरानमाथि आक्रमण गर्‍यो भन्ने अत्यन्त गैरजिम्मेवारपूर्ण दाबीसहित, यी आरोपहरू सेगलले पछिल्ला दिनहरूमा गरेका झुटा रिपोर्टहरूको शृङ्खलाकै पछिल्लो कडी हुन्,’ उनले भने।

नेतान्याहुका मिडिया सहयोगीहरूले लामो समयदेखि ‘यस क्षेत्रमा विवाद सिर्जना गर्ने उद्देश्यले यस्ता दाबीहरू’ फैलाउँदै आएको ती अधिकारीले बताए।

उनले थपे, ‘यस्तो बेला जब यस क्षेत्रलाई तत्काल तनाव कम गर्न आवश्यक छ, यस्ता भाष्यहरूले खतरनाक नजिर स्थापित गर्छन् र तिनीहरूको लापरवाह र खराब मनसायको पर्दाफास हुनुपर्छ।’