२०८२ चैत १८ गते १५:३७ 
News Summary
Generated by OK AI. Editorially reviewed.- सन्दीप लामिछानेले ७ विकेट लिएपछि पीएम कपमा बागमती प्रदेशले कर्णाली प्रदेशमाथि जित हासिल गरेको छ ।
- बागमतीले दिएको १८१ रनको लक्ष्य पछ्याएको कर्णाली २५.१ ओभरमा १२० रनमा अलआउट भयो ।
- बागमतीका लागि बिबेक मगरले ५६ रन बनाएका थिए ।
१८ चैत, काठमाडौं । सन्दीप लामिछानेले एक्लै ७ विकेट लिँदै घातक बलिङ गरेपछि पीएम कप पुरुष राष्ट्रिय क्रिकेट प्रतियोगितामा बागमती प्रदेशले कर्णाली प्रदेशलाई पराजित गरेको छ ।
बुधबार जनकपुरमा भएको खेलमा बागमतीले कर्णालीमाथि ६० रनको जित हासिल गरेको हो । बागमतीले दिएको १८१ रनको लक्ष्य पछ्याएको कर्णाली २५.१ ओभरमा १२० रनमा अलआउट भयो ।
निश्चल रावलले सर्वाधिक ३१ रन बनाए । दिनेश अधिकारीले २२ तथा बिपिन शाहीले १५, सुनिल धमलाले १४ रन बनाए । कप्तान दिवान पुनले १० रन बनाए । अन्यले दोहोरो अंकमा रन जोड्न सकेनन् ।
बागमतीका लागि सन्दीपले ९.१ ओभरमा ४० रन दिएर ७ विकेट लिए । पीएम कप इतिहासमा यो चौथो उत्कृष्ट बलिङ हो । यसअघि नेपाल पुलिसका दीपेन्द्र सिंह ऐरी, मधेशका कुमार थापा र कर्णालीका दीपेन्द्र रावतले पनि ७ विकेट लिएर शीर्ष ३ मा छन् ।
रिजन ढकाल, प्रतिश जीसी र सुवास खत्रीले १-१ विकेट लिए ।
त्यसअघि टस हारेर पहिले ब्याटिङ गरेको बागमतीले ३८.४ ओभरमा अलआउट हुँदै १८० रन बनाएको थियो । बिबेक मगरले ५६ रन बनाए भने इशान पान्डेले २७, पवन थापाले २२, शुभ कंसाकारले २० अनि शिवम तिवारीले १८ रन बनाए ।
कर्णालीका लागि कप्तान दिवानले ८ ओभरमा २८ रन दिएर ३ विकेट लिए । प्रकाश जैशी, दिपेन्द्र रावत र निश्चल रावलले २-२ विकेट लिए ।
प्रतिक्रिया 4