झूटो वाचाले फस्यो एप्पल, आइफोन प्रयोगकर्तालाई तिर्दैछ करोडौं डलर क्षतिपूर्ति

आफ्नो महत्वाकांक्षी एआई टूल एप्पल इन्टेलिजेन्सलाई लिएर कानूनी विवादमा फसेको दिग्गज प्रविधि कम्पनी एप्पल निकै महंगो सम्झौता गर्न बाध्य भएको छ ।

यदि उक्त सम्झौतालाई अमेरिकी अदालतले स्वीकृत गरेमा अमेरिकाका केही आइफोन प्रयोगकर्ताहरूले एप्पल कम्पनीबाट क्षतिपूर्ति पाउनेछन् ।

यो विवाद एप्पल इन्टेलिजेन्सको मार्केटिङ र त्यसका बारेमा एप्पलले गरेका विभिन्न महत्वाकांक्षी वाचासँग सम्बन्धित छ । सन् २०२४ को वर्ल्डवाइड डेभलपर्स कन्फ्रेन्स कार्यक्रममा एपलले निकै ठूलो हल्लाखल्ला सहित आफ्नो नयाँ एआई सिस्टमको घोषणा गरेको थियो ।

त्यसक्रममा एप्पलले आफ्न नयाँ डिभाइसमा निकै उन्नत स्मार्ट सिरी, राइटिङ असिस्टेन्स, नोटिफिकेशन समरी तथा उत्कृष्ट कन्टेक्स्चुअल टुल्स जस्ता सुविधाहरू उपलब्ध हुने सपना देखाएको थियो ।

तर जब एप्पलका नयाँ डिभाइसहरू बजारमा आए वाचा गरिएका अधिकांश एआई सुविधाहरू प्रयोगकर्ताले देख्न पाएनन् अनि कति निकै ढिलोगरी मात्रै उपलब्ध भए ।

ग्राहकहरूले एप्पलका तिनै लोभलाग्दा विज्ञापनहरूमा विश्वास गरेर अत्याधनिक एआई फिचरका लागि महँगा आइफोन किनेपनि कम्पनीबाट धोका पाएको दाबी अदालतमा गरिएको छ ।

अन्तत: आफूविरुद्धको उक्त मुद्दा मुद्दामा २५ करोड डलर क्षतिपूर्ति दिएर मिलापत्र गर्न एप्पल सहमत भएको छ ।

त्यो क्षतिपूर्ति मुख्य रूपमा ती अमेरिकी ग्राहकहरूलाई दिइनेछ जसले सन् २०२४ को जुनदेखि सन् २०२५ को मार्च महिनाभित्रमा आइफोन १६ तथा आइफोन १५ सिरिजका विभिन्न मोडेल खरिद गरेका थिए ।

एप्पलले गरेको सम्झौता अनार योग्य आइफोन प्रयोगकर्ताहरूले प्रति फोन २५ डलरदेखि ९५ डलरसम्म क्षतिपूर्ति प्राप्त गर्न सक्छन् । तर अन्तिम रकम कति पाउने भन्ने कुरा आवेदकको संख्या तथा दाबी भुक्तानी प्रक्रिया सुरु भएपछि मात्रै एकिन हुनेछ ।

एपलको सफाइ: हामीले कुनै गल्ती गरेका छैनौं

उता करोडौं डलर क्षतिपूर्ति दिन तयार भएको एप्पलले यो मामिलामा कम्पनीले कुनै पनि प्रकारको ठगी वा गलत कार्य नगरेको जिकिर गरेको छ ।

पहिलो घोषणापछि आफ्ना प्लेटफर्महरूमा धेरै एप्पल इन्टेलिजेन्स सुविधाहरू सार्वजनिक गरिसकेको दाबी एप्पलले आफ्नो बयानमा गरेको छ । त्यसैले क्षतिपूर्ति दिएर भएपनि कानुनी विवाद समाधान गर्नुको उद्देश्य भविष्यका उत्पादन र सेवाहरूमा ध्यान केन्द्रित गर्नु रहेको एप्पलले जनाएको छ ।

एप्पलद्वारा प्रस्तावित उक्त समझौतालाई अमेरिकाको नर्दन डिस्ट्रिक्ट अफ क्यालिफोर्नियाको जिल्ला अदालतले अन्तिम स्वीकृति दिएपछि मात्र कार्यान्वयनमा आउनेछ ।

एआई जगतमा दिग्गज प्रविधि कम्पनीहरुबीच तीव्र प्रतिस्पर्धा चलिरहेको बेलामा एप्पल चाहीँ यस्तो कानुनी विवादमा फसेको हो । अहिले गुगल माइक्रोसफ्ट तथा ओपन एआईजस्ता  कम्पनीहरूले तीव्र रूपमा आफ्ना  एआई  सुविधाहरूको विस्तार गरिरहेका छन् । यस्तो अवस्थामा एप्पलमाथि आफ्नो अग्रणी स्थान सुरक्षित राख्न ठूलो दबाब परेको छ ।

यसअघि पनि एप्पलले आफ्नो अपडेट गरिएको सिरी प्रयोगकर्तामाझ ल्याउनमा भएको ढिलाइ तथा एआई सिर्जित गलत नोटिफिकेशन समरीका कारण कडा आलोचना झेल्नुपरेको थियो । एजेन्सी