परराष्ट्रमन्त्रीलाई रास्वपा सांसदको प्रश्न : ‘सुगौली सन्धिको कपी कहाँ छ ?’

‘रिसर्चर भिसा’का लागि पहल गर्न आग्रह

अनलाइनखबर

२०८३ जेठ ६ गते १०:१३

परराष्ट्र मन्त्री शिशिर खनाल । फाइल फोटो

News Summary

Generated by OK AI. Editorially reviewed.

राष्ट्रिय स्वतन्त्र पार्टीका सांसद धनन्जय रेग्मीले प्रतिनिधि सभा अन्तर्राष्ट्रिय सम्बन्ध र पर्यटन समितिको बैठकमा सुगौली सन्धिको कपी पढ्न नपाएको बताएका छन्।
रेग्मीले नेपालमा रिसर्चर भिसा नदिइएको र यसका लागि पहल गर्न आग्रह गरेका छन्।
उनीहरूले विदेशमा रहेका नेपालीको संख्या, विद्यार्थी र पठाइएको पैसा सम्बन्धमा समस्या पहिचान गरी समाधान गर्न सुझाव दिएका छन्।

६ जेठ, काठमाडौं । राष्ट्रिय स्वतन्त्र पार्टी (रास्वपा) सांसद धनन्जय रेग्मीले सुगौली सन्धिको कपी पढ्न नपाएको बताएका छन् । बुधबार प्रतिनिधि सभा अन्तर्गतको अन्तर्राष्ट्रिय सम्बन्ध र पर्यटन समितिको बैठकमा बोल्दै उनले यस्तो बताएका हुन् ।

मन्त्री शिशिर खनाल उपस्थित बैठकमा रेग्मीले भने, ‘बोर्डरको समस्या के हो ? सुगौली सन्धि के रहेछ ? पढ्न पाएनौं । त्यसको कपि कहाँ छ ? पढ्न पाए थाहा लाग्दथ्यो ।’

‘रिसर्चर भिसा’का लागि पहल गर्न आग्रह

फरक प्रसङ्गमा सांसद रेग्मीले ‘रिसर्चर भिसा’ दिने व्यवस्थाको लागि पहल गर्न पनि आग्रह गरे ।

‘नेपालमा रिसर्चर भिसा दिने गरिएको छैन । रिसर्चरहरु टुरिष्ट भिसामा आउने गर्दछन् । उनीहरूलाई रिसर्च भिसा दिए सम्मान पनि बढ्छ । प्रोत्साहन पनि हुन्छ,’ उनले भने ।

विदेशमा रहेका नेपाली कति छन् र कुन अवस्थामा छन् त्यो थाहा पाएर अगाडि बढ्न सक्दा सहज हुने पनि उनको सुझाव छ । ‘एनआरएनको संख्या कति छ ? कति विद्यार्थी गएका छन् ? कति पैसा कुन च्यानलबाट पैसा लगेको ? समस्या पहिचान गरेपछि समस्या समाधान गर्न सकिन्छ,’ उनले भने, ‘रेमिटेन्स आएको हेरेका छौँ । गएको हेरेनौं ।’

अन्तर्राष्ट्रिय सम्बन्ध र पर्यटन समितिको आजको बैठकमा परराष्ट्र मन्त्रालयको नीति, योजना र चालु कार्यक्रमबारे छलफल भइरहेको छ ।