अन्डाको मूल्यमा उच्च रेकर्ड

News Summary

Generated by OK AI. Editorially reviewed.

नेपाल लेयर्स कुखुरापालक संघले आजदेखि लागू हुने गरी सबै प्रकारका अन्डाको फार्म समर्थन बिक्री मूल्य प्रतिक्रेट १५ रुपैयाँ बढाएको छ ।
नयाँ मूल्यअनुसार एक्सएल अन्डा प्रतिक्रेट ६ सय ५, ठूलो ५ सय ९० र मिडियम ५ सय ५० रुपैयाँ पुगेका छन् ।
संघले चितवनलाई आधार मानेर देशभरि मूल्य तय गरिएको र दाना, औषधि तथा ढुवानी खर्च बढेकाले समायोजन गरिएको जनाएको छ ।

१९ भदौ, काठमाडौं । नेपाल लेयर्स कुखुरापालक संघले फार्म समर्थन बिक्री मूल्यमा पुन: वृद्धि गरेसँगै बजारमा अन्डाको भाउले नयाँ रेकर्ड कायम गरेको छ ।

आज शुक्रबारदेखि लागु हुने गरी संघले सार्वजनिक गरेको नयाँ मूल्य सूची अनुसार सबै प्रकारका अन्डामा प्रतिक्रेट १५ रुपैयाँ वृद्धि गरिएको छ ।

यो वृद्धिसँगै अन्डाको फार्म मूल्य हालसम्मकै उच्च बिन्दुमा पुगेको छ । लागत मूल्यमा भएको वृद्धि र बजार माग सन्तुलनमा राख्न मूल्य समायोजन गर्नुपरेको संघको दाबी छ ।

यसअघि ४ भदौमा तोकिएको मूल्य अनुसार एक्सएल आकारको अन्डाको फार्म मूल्य प्रतिक्रेट ५ सय ९० रुपैयाँ रहेकोमा अहिले १५ रुपैयाँ बढेर ६ सय ५ रुपैयाँ पुगेको छ ।

त्यसैगरी ठूलो अन्डा प्रतिक्रेट ५ सय ७५ बाट ५ सय ९० रुपैयाँ पुगेको छ भने मिडियम अन्डाको मूल्य ५ सय ३५ बाट ५ सय ५० रुपैयाँ कायम भएको छ ।

सानो अन्डाको हकमा भने प्रतिपेटी ३ हजार २ सय रुपैयाँ नै यथावत राखिएको छ । यो फार्म मूल्य हो । उपभोक्ता मूल्य भने २५ रुपैयाँ तोकिएको छ ।

त्यस्तै मिडियम अन्डा दुई वटा खरिद गर्दा उपभोक्ताले ४५ रुपैयाँ (प्रति गोटा साढे २२ रुपैयाँ) भुक्तानी गर्नुपर्ने छ ।

संघ सचिव मदन पोखरेलका अनुसार चितवनलाई मुख्य आधार मानी यो मूल्य देशभरिका लागि तय गरिएको हो ।

पछिल्लो समय कुखुराको दाना, औषधि र ढुवानी खर्चमा भएको निरन्तरको मूल्य वृद्धिका कारण किसान मर्कामा परिरहेको संघले बताउँदै आएको छ ।