च्याम्पियन्स लिगमा सबैभन्दा सफल रियल मड्रिड, कसको कति उपाधि ?

काठमाडौं । युरोपेली क्लब फुटबलको सबैभन्दा प्रतिष्ठित प्रतियोगिता यूईएफए च्याम्पियन्स लिगमा स्पेनिस क्लब रियल म्याड्रिड सबैभन्दा सफल टोलीका रूपमा रहेको छ ।

प्रतियोगिताको पुरानो युरोपियन कपसहित गणना गर्दा रियलले १५ पटक उपाधि जितेको छ । दोस्रो स्थानमा रहेको इटालियन क्लब एसी मिलानले सात उपाधि जितेको छ भने लिभरपुल र बायर्न म्युनिखले समान ६ पटक उपाधि उचालेका छन् ।

सन् १९५५–५६ मा युरोपियन कपका रूपमा सुरु भएको प्रतियोगितालाई सन् १९९२–९३ देखि यूईएफए च्याम्पियन्स लिगका रूपमा सञ्चालन गर्न थालिएको थियो ।

नाम र ढाँचा परिवर्तन भए पनि दुवै प्रतियोगिताका उपाधिलाई एउटै ऐतिहासिक सूचीमा गणना गरिन्छ । हालसम्म १० देशका २४ क्लबले युरोपियन च्याम्पियनको उपाधि जितेका छन् ।

पहिलो पाँच संस्करणमै रियलको उपाधि

रियल म्याड्रिडले प्रतियोगिताको सुरुवाती पाँच संस्करण लगातार जितेको थियो । सन् १९५६ देखि १९६० सम्म लगातार च्याम्पियन बनेको रियलले त्यसपछि पनि विभिन्न दशकमा उपाधि जित्दै आफ्नो अग्रता कायम राख्यो ।

रियलले सन् २०१६, २०१७ र २०१८ मा लगातार तीन संस्करण जितेको थियो । च्याम्पियन्स लिग नामकरण भएपछि लगातार तीनपटक उपाधि जित्ने रियल एकमात्र क्लब हो । सन् २०२४ मा बोरुसिया डर्टमन्डलाई फाइनलमा पराजित गर्दै रियलले १५औं उपाधि जितेको थियो ।

सन् १९९२–९३ देखि सुरु भएको च्याम्पियन्स लिग युगको मात्रै तथ्यांक हेर्दा पनि रियल म्याड्रिड नौ उपाधिसहित शीर्ष स्थानमा छ । यस अवधिमा बार्सिलोनाले चार तथा एसी मिलान र बायर्न म्युनिखले तीन–तीन उपाधि जितेका छन् ।

लिभरपुल, म्यानचेस्टर युनाइटेड, चेल्सी र पेरिस सेन्ट जर्मेनले पनि यस युगमा उपाधि जितेका छन् ।

युरोपियन कप र च्याम्पियन्स लिगको संयुक्त इतिहासमा एसी मिलान सात उपाधिसहित दोस्रो स्थानमा छ । लिभरपुल र बायर्न म्युनिखले समान ६ उपाधि जितेका छन् । बार्सिलोनाले पाँच तथा आयाक्सले चारपटक उपाधि जितेका छन् ।

इन्टर मिलान र म्यानचेस्टर युनाइटेडले तीन–तीनपटक प्रतियोगिता जितेका छन् । चेल्सी, युभेन्टस, बेन्फिका, नटिङ्घम फरेस्ट, पेरिस सेन्ट जर्मेन र पोर्टोले दुई–दुई उपाधि जितेका छन् । 

खेलाडी र प्रशिक्षकका कीर्तिमान

च्याम्पियन्स लिगको व्यक्तिगत कीर्तिमानमा क्रिस्टियानो रोनाल्डो सर्वाधिक गोल गर्ने खेलाडीका रूपमा छन् । यूईएफएको तथ्यांकअनुसार उनले प्रतियोगितामा १४० गोल गरेका छन् ।

एकै सिजन सर्वाधिक १७ गोल गर्ने कीर्तिमान पनि रोनाल्डोकै नाममा छ । उनले सन् २०१३–१४ को सिजनमा उक्त उपलब्धि हासिल गरेका थिए ।

प्रशिक्षकतर्फ कार्लो एन्सेलोटीले पाँचपटक युरोपियन कप वा च्याम्पियन्स लिग जितेका छन् । उनले एसी मिलानबाट सन् २००३ र २००७ तथा रियल म्याड्रिडबाट सन् २०१४, २०२२ र २०२४ मा उपाधि जितेका थिए । यससँगै उनी प्रतियोगिताको इतिहासमा सर्वाधिक उपाधि जित्ने प्रशिक्षक बनेका छन् ।