मच्छिन्द्र एएफसी कपमा छनोट, फ्रेण्ड्सलाई रेलिगेसनको चिन्ता

२० पुस, काठमाडौं । शहीद स्मारक ए डिभिजन लिगको सातौं चरण अर्थात म्याच विक सेभेन समाप्त भएको छ । सातौं चरणपछि एउटा विषय भने टुङ्गिएको छ ।

एएफसी कप छनोटका लागि सातौं चरणको शीर्ष टिम छनोट हुने प्रावधान थियो । क्लब लाइसेन्स पाएका चार क्लबमध्ये सातौ चरणसम्म धेरै अंक जोडेर मच्छिन्द्रले बाजी मारेको छ ।

७ खेलसम्म अपराजित मच्छिन्द्रले उपाधि होडमासमेत आफ्नो पकड बनाएको छ । मच्छिन्द्रले अब खेल्ने विपक्षीहरु तुलनात्मक रुपमा पनि सजिलो छ ।

यस्तै सातौं चरणमा आएर थ्री स्टारले ५ खेलपछि पहिलो जित हात पार्‍यो । फ्रेण्ड्स भने अझै जितविहीन छ । लिगमा एक खेल पनि नजित्ने एक्लो टिमको रुपमा फ्रेण्ड्स रहेको छ ।

घरेलु मैदान पोखरामा मनाङले सिजनको दोस्रो खेल खेल्दा कप्तान अन्जन विष्ट फेरि नायक बने । सातौं चरणको विशेषता यस्ता छन् :

मच्छिन्द्र एएफसी कपमा छनोट

आइतबार भएको लिगको ४८औं खेलमा नेपाल पुलिस क्लबलाई १-० ले हराएर मनाङलाई एक अंकले पछि पार्दै मच्छिन्द्र फुटबल क्लब पहिलो पटक एएफसी कपको प्रारम्भिक चरणका लागि छनोट भएको छ ।

गत सिजन लिग जितेर पनि क्लब लाइसेन्स नभएकोले एएफसी कप खेल्ने मौका गुमाएको मच्छिन्द्रले यस सिजन भने सातौं चरणपछि नै शीर्ष स्थानमा रहेर त्यो मौका पायो ।

यस सिजनमा मच्छिन्द्रसहित आर्मी, मनाङ र एपीएफले क्लब लाइसेन्स पाएका थिए । त्यसमध्ये सातौं चरणमा धेरै अंक जोड्ने क्लब एएफसी कप छनोट खेल्न जाने एन्फाले यसअघि नै निर्णय गरिसकेको थियो ।

अघिल्लो खेलमा मनाङलाई नै पराजित गरेर मच्छिन्द्रले त्यो बाटो केही सहज बनाएको थियो । तर सातौ चरणमा ब्रिगेडलाई हराएर मनाङ शीर्ष स्थानमा उक्लिएपछि मच्छिन्द्रमाथि दबाब बढेको थियो । सुनिल बल फेरि एक पटक निर्णायक बनेपछि पुलिसलाई १-० ले हराएरमच्छिन्द्रले एएफसी कपमा स्थान पक्का गरेको हो ।

सुरुको ७ खेलमा विपक्षी बलियो हुँदा पनि मच्छिन्द्रले ५ जित र २ बराबरीको नतिजासहित अपराजित यात्रा समेत कायम राखेको छ । साथै उपाधि होडमा समेत आफूलाई फ्रन्ट रनरको रुपमा राखेको छ ।

मच्छिन्द्रले अब खेल्ने विपक्षी तुलनात्मक रुपमा अंक तालिकामा पछि रहेका टिमहरु भएकोले पनि अब कुनै अप्रत्यासित नतिजा नआए मच्छिन्द्रलाई उपाधि रक्षा गर्न सहज हुने स्थिति देखिएको छ ।

च्याम्पियन बन्ने जस्तो भएन आर्मी

साविक उपविजेता आर्मीले यस पटक लिग उपाधि जित्ने लक्ष्य राखेको थियो । सातौं चरणसम्म आइपुग्दा टोली अपराजित त छ तर च्याम्पियन बन्ने जस्तो खेल्न सकेको छैन ।

आर्मीले जम्मा २ खेल मात्र जित्दा ५ खेल बराबरी खेलेको छ । यसको अर्थ १० अंक गुमाइसकेको छ । शनिवार विभागीय डर्बीमा एपीएफसँग बराबरीमा रोकिएपछि आर्मीका प्रशिक्षक नविन न्यौपानेले पनि लगातार बराबरीले उपाधि होड कमजोर बन्दै गएको संकेत गरे ।

उनले च्याम्पियन बन्ने लक्ष्य राखेको टिमले त्यो शैलीमा खेल्न देखाउन नसकेको स्वीकार गरे । ‘च्याम्पियन बन्ने लक्ष्यसहित खेलेको ५ बराबरी भइसक्यो । अब शीर्ष चारका लागि खेल्नुपर्ने स्थिति आयो ।’

७ खेलबाट ११ अंक जोडेको आर्मी अंक तालिकामा पनि अहिले चौथो स्थानमै छ । आर्मीलाई हिमालयन शेर्पाले समेत अंकतालिकामा भेट्टाइसकेको छ । शेर्पाले ३ जित २ बराबरी र २ हारबाट ११ अंक जोडेको छ । गोलअन्तरमा भने शेर्पा पछि रहँदै पाँचौ स्थानमा छ ।

विदेश खेलाडी हाबी बनेको खेल

न्यूरोड टिम (एनआरटी) र फ्रेण्ड्स क्लबबीचको खेलमा कूल ५ गोल हुँदा सबै विदेशी खेलाडीले गोल गरे । जसमा क्यामरुनका खेलाडीले ३ गोल गरे भने ट्रिनिडाड एण्ड टोबागोका दुई खेलाडीले गोल गरे ।

एनआरटीबाट खेललेका क्यारुनमा मेसुके ओलोमोउ दुई र स्टेफेन समिरले एक गोल गरे । यस्तै फ्रेण्ड्सबाट खेल्ने तथा अन्य तीन खेलाडीले समान एक गोल गरे ।

सातौं चरणमा एकै खेलमा धेरै खेल गोल भएको खेल समेत यही नै हो ।

५ खेलपछि थ्री स्टारको जित

उपाधिको दाबेदार अनी चर्चित क्लब थ्री स्टारले ५ खेलपछि सातौं चरणमा आएर जित हात पार्‍यो । सिजनको पहिलो खेलम च्यासललाई ३-० ले हराएको थ्री स्टार लगातार पाँच खेलमा जितविहीन थियो । पाँचमध्ये चार खेल बराबरी गरेको थ्री स्टारले एक खेल हारेको थियो ।

पहिलो खेलमा ललितपुरकै क्लबलाई हराएको थ्री स्टारले सातौं चरणमा पनि ललितपुरकै अर्को क्लब जावलाखेल युथ क्लबलाई २-१ ले हरायो । यसबीच थ्री स्टारको अर्को ललितपुरे क्लब फ्रेण्ड्ससँग बराबरी खेल्दा नवप्रवेशी ललितपुरकै सातदोबाटोसंग पराजित भएको थियो । यस सिजन थ्री स्टारको एउटै हार त्यही सातदोबाटोसँग थियो ।

७ खेलबाट थ्री स्टार छैटौं स्थानमा उक्लेको छ ।

पोखरामा अन्जन नायक

कप्तान अन्जन विष्ट फेरि नायक बन्दा घरेलु मैदान पोखरा रंगशालमा मनाङ मर्स्याङ्दी क्लबले ब्रिगेड ब्वाइज क्लबलाई १-० ले हरायो । उनले पहिलो हाफको इन्जुरी टाइममा गोल गरे ।

यसै सिजन देखि एन्फाले काठमाडौं बाहिर लिगका खेल खेलाउँदा मनाङले घरेलु मैदान पोखरामा दुई खेल खेलिसकेको छ । पाँचौ चरणमा मनाङले पुलिसलाई ३-१ ले पराजित गर्दा पनि अन्जनले २ गोल गरेका थिए । उनी दुवै खेलमा म्यान अफ दि म्याच समेत घोषित भए ।

घरेलु मैदानमा खेल्दा मनाङले पोखरेली दर्शकको साथ पाउँदा अन्जन भने निर्णायक बनिरहेका छन् ।

फ्रेण्ड्सलाई रेलिगेसनको चिन्ता 

हरेक चरणमा फ्रेण्ड्स जितविहीन बन्दै आएको छ । लिगको आधाभन्दा बढी खेल सकिँदा फ्रेण्डले जित हात पार्न सकेको छैन । जसले गर्दा रेलिगेसन दबाब पनि चर्को बनेको छ । ७ खेल खेल्दा ३ बराबरीबाट जम्मा ३ अंक जोडेको फ्रेण्ड्सले चार हार बेहोरेको छ ।

सातौं चरणमा फ्रेण्ड्स एनआरटीसँग ३-२ ले पराजित भयो । विपक्षीलाई कडा प्रतिस्पर्धा दिए पनि फ्रेण्ड्सले खेल जित्न सकिरहेको छैन ।

सातौं चरणमा पनि जित निकाल्न नसकेपछि फ्रेण्ड्सका प्रशिक्षक मृगेन्द्र मिश्रले रेलिगेसनको दबाब पर्न थालेको बताए । उनले लिगअघि नै रेलिगेसनबाट बच्ने लक्ष्यसहित खेलेको अबको खेलमा त्यही लक्ष्यलाई सफल पार्ने प्रयास गर्ने बताए । फ्रेण्ड्स ३ अंक जोडेर पुछारमा छ । यस पटक २ टिम रेलिगेसनमा पर्ने भएकोले पनि फ्रेण्ड्सलाई अझ दबाब बढेको छ ।

यस्तै फ्रेण्ड्सभन्दा अघि रहेका ब्रिगेड ब्वाइज क्लब र च्यासल युथ क्लबलाई पनि रेलिगेसनको दबाब परिरहेको छ । दुवैको ७ खेलबाट समान ५ अंक छ । गोलअन्तरमा ब्रिगेड अघि रहँदा च्यासल रेलिगेसन जोनमै छ ।

यी क्लबभन्दा ठिक अघि रहेका दुई विभागीय टोली एपीएफ र नेपाल पुलिसको पनि समान ६ अंक मात्र छ ।

स्कोरिङमा सुनिल बल, पोष्टमा विशाल अब्बल

मछिन्द्रले एएफसी कप छनोटमा स्थान पक्का गर्दा यस टिमका दुई खेलाडीले गज्जबको प्रदर्शन गरिरहेका छन् । तथ्याङ्कले पनि यो पुष्टि गर्छ । अहिलेसम्म लिगमा सर्वाधिक गोल गर्नेमामच्छिन्द्रका सुनिल बल छन् ।

उनले ७ खेलमा ५ गोल गरेका छन् । त्यसमा पनिमच्छिन्द्रले पछिल्ला दुई खेलमा मनाङ मर्स्याङ्दी र नेपाल पुलिसलाई १-० ले पराजित गर्दा दुवैमा सुनिलले निर्णायक गोल गरे ।

यस्तै गोल रोक्नेमा पनि मच्छिन्द्रकै विशाल श्रेष्ठ अब्बल देखिएका छन् । उनले पहिलो खेलमा एनआरटीविरुद्ध एक गोल बेहोरेका थिए । त्यसयता लगातार ६ खेलमा विशाल क्लिनसिट राख्दै ५७६ मिनेट कुनै गोल खाएका छन् । विशालविरुद्ध एनआरटीका एरिक विष्टले उत्कृष्ट गोल गरेका थिए ।

मैदानको विषयमा पनि उठ्यो प्रश्न

सातौं चरणसम्म भएका कूल ४९ मध्ये ४७ खेल दशरथ रंगशालमै खेलाइएको छ । बाँकी दुई खेलमा मनाङले नेपाल पुलिस क्लब र ब्रिगेडसँग पोखरा मैदानमा खेलेको थियो ।

पछिल्लो समय पानी परेकोले दशरथ रंगशालाको मैदान पनि भिजेको थियो । लिग शुरू हुने बेला मैदानको अवस्था राम्रो हरेपनि निरन्तर खेल हुँदा मैदानको अवस्था पनि कमजोर हुँदै गएको छ ।

सातौं चरणको अन्तिम खेलमा सातदोबाटोलाई हराएपछि हिमालयन शेर्पाका प्रशिक्षक युगल किशोर राईले मैदानको अवस्थामा प्रश्न उठाए । उनले मैदान खराब हुँदै गएको बताए ।

कप्तान विश्वास श्रेष्ठको पेनाल्टी गोल अनी अन्तिम समयमा गोलकिपर दिप कार्कीले पेनाल्टी सेभ गरेपछि शेर्पाले कठिन जित हात पारेको थियो । ३ अंकबाट खुशी भए पनि प्रदर्शनबाट प्रशिक्षक राई सन्तुष्ट थिएनन् ।

साथै उनले मैदान पनि खेल्न लायक नभएको बताए । ‘मैदानको अवस्था खराब हुँदै गएको छ । अब यो विषय पनि बाहिर आउनुपर्‍यो ।’ उनले खेलपछि भने । यस्तै राईले खेलमा रेस्पेक्टको समेत अभाव भएको बताए । उनले पेनाल्टी पाउनुपर्ने विषयमा कमेन्ट गर्दा लाइन्समेन हाँसेको भन्दै त्यो राम्रो नभएको तर्क गरे ।

सातौं चरणको खेलको नतिजा

एपीएफ १-१ त्रिभुवन आर्मी

फ्रेण्ड्स २-३ एनआरटी

थ्री स्टार २-१ जावलाखेल

मनाङ १-० ब्रिगेड

संकटा ०-० च्यासल

पुलिस ०-१ मच्छिन्द्र

सातदोबाटो ०-१ हिमालयन शेर्पा

सातौं चरणको गोलकर्ता

जर्ज प्रिन्स कार्की, आर्मी

बिके तामाङ, एपीएफ

मेसुके ओलोमोउ २ गोल, एनआरटी

स्टेफन समिर, एनआरटी

नाथनियल जुड गार्सिया र एन्टोनी जमाउल फ्रानकोइस, फ्रेण्ड्स

आयुष घलान र ऋतिक कुमार खड्का, थ्री स्टार

निकोलस फर्नान्डेज, जावलाखेल

अन्जन विष्ट, मनाङ

सुनिल बल,मच्छिन्द्र

विश्वास श्रेष्ठ, हिमालयन शेर्पा क्लब