रुपन्देही–२ मा राजु गुरुङको उम्मेदवारी खारेज नगर्न सर्वोच्चको आदेश

३० असोज, काठमाडौं । सर्वोच्च अदालतले रुपन्देही–२ का नेकपा एकीकृत समाजवादीका उम्मेदवार राजु गुरुङको उम्मेदवारी खारेज गर्ने निर्वाचन अधिकृतको निर्णय कार्यान्वयन नगर्न अल्पकालीन अन्तरिम आदेश जारी गरेको छ ।

आइतबार न्यायाधीश विश्वम्भरप्रसाद श्रेष्ठको इजलासले गुरुङको उम्मेदवारी खारेज गर्ने निर्णय कार्यान्वयन नगर्न अल्पकालीन आदेश दिँदै अन्तरिम आदेशका लागि दुबै पक्षलाई २ कात्तिकमा छलफलमा बोलाएको छ ।

त्यस्तै सर्वोच्चले निर्वाचन आयोगलगायतका विपक्षीसँग गुरुङको उम्मेदवारी खारेज गर्नुको कारणसमेत माग गरेको छ ।

बैंकिङ कसूर मुद्दामा कालोसूचीमा रहेको भन्दै निर्वाचन अधिकृत उदवीर नेपालीले २६ असोजमा गुरुङको उम्मेदवारी खारेजीको निर्णय गरेका थिए । गुरुङले निर्वाचन अधिकृतलाई उम्मेदवारी खारेज गर्ने अधिकार नभएको भन्दै आफ्नो उम्मेदवारी खारेजीको निर्णयविरुद्ध सर्वोच्च अदालतमा रिट दिएका थिए ।

नेकपा एमालेले गुरुङको उम्मेदवारी कायम होस् भन्ने पार्टीको धारणा रहेको प्रतिक्रिया दिएको छ । रुपन्देही–२ का एमाले निर्वाचन परिचालन कमिटी संयोजक नेत्र पन्थीले अदालती प्रक्रियाबारे पार्टीको चासो नरहेपनि गुरुङको उम्मेदवारी खारेजको निर्णय कार्यान्वयन नगर्न आएको आदेशले पार्टीलाई कुनै फरक नपर्ने बताए ।

‘सामाजिक सञ्जालहरुमा पार्टीलाई जोडेर आएका टीकाटिप्पणीप्रति पार्टीको ध्यान गएको छ’, पन्थीले भने, ‘हामी कसैको उम्मेदवारी खारेज होस् भन्ने चाहेका छैनौं, जोसुकै मैदानमा आएपनि प्रतिस्पर्धा गरेर जितका लागि तयार छौं ।’