महासंघको आन्दोलनप्रति १५ शिक्षक संघ-संगठनको ऐक्यबद्धता

फाइल तस्वीर

२५ चैत, काठमाडौं । १५ वटा शिक्षक संघ-संगठनहरूले नेपाल शिक्षक महासंघको काठमाडौं केन्द्रित आन्दोलनप्रति एक्यबद्धता जनाएका छन् ।

नेपाल शिक्षक संघ, नेपाल राष्ट्रिय शिक्षक संगठन, एकीकृत अखिल नेपाल शिक्षक संगठन, अखिल नेपाल शिक्षक संगठन, अखिल नेपाल शिक्षक संघ, अध्यक्ष राष्ट्रिय शिक्षक मञ्च, संघीय शिक्षक फोरम, प्रगतिशील नेपाल राष्ट्रिय शिक्षक संगठन, मधेशी शिक्षक फोरम लोकतान्त्रिक, लोकतान्त्रिक शिक्षक युनियन एका, नेपाल राष्ट्रिय शिक्षक परिषद्, अखिल नेपाल राष्ट्रिय शिक्षक संगठन, मधेशी आदिवासी शिक्षक संरक्षण मञ्च, नेपाल विद्यालय कर्मचारी परिषद् र संस्थागत विद्यालय शिक्षक युनियनले विज्ञप्ति जारी गर्दै महासंघको आन्दोलनप्रति एक्यबद्धता जनाएका हुन् ।

ती संघसंगठनहरूले विद्यालय बन्द गरेर काठमाडौं केन्द्रित सडक आन्दोलनमा सहभागी हुन देशभरिका शिक्षकहरूलाई आग्रह समेत गरेका छन् ।

शिक्षक आन्दोलन अवधिभर उत्तर पुस्तिका परीक्षण नगर्न आग्रह गर्दै तालिम, गोष्ठी, सेमिनार तथा सार्वजनिक कार्यक्रमहरूमा समेत सहभागी नहुन उनीहरूले शिक्षकहरूसँग आग्रह गरेका छन् ।

नयाँ शिक्षा ऐन जारी नभएसम्म आन्दोलनको मोर्चामा डटिरहन आग्रह गर्दै उनीहरूले भनेका छन्, ‘यो आन्दोलन अवधिमा उत्तर पुस्तिका परीक्षण, नतिजा प्रकाशन एवं नेपाल सरकार, प्रदेश सरकार तथा ती अन्तर्गतका र स्थानीय तह लगायतबाट राखिएका तालिम, गोष्ठी, सेमिनार तथा सार्वजनिक कार्यक्रममा संलग्न नहुन सबै शिक्षक-कर्मचारी साथीहरूमा आग्रह गर्दछौं ।’

२० चैतदेखि काठमाडौंमा अनिश्चितकालीन शैक्षिक सडक आन्दोलन चलिरहेको भन्दै आन्दोलनलाई अझ सशक्त गराउन महासंघले २५ चैतदेखि शैक्षिक हड्ताल समेत घोषणा गरेको छ ।