पर्यटन बोर्डमा चित्रकला प्रदर्शनी

News Summary

Generated by OK AI. Editorially reviewed.

नेपाल पर्यटन बोर्डले काठमाडौंमा ‘कुण्डलिनी–२’ शीर्षकमा भीमप्रसाद शर्माका चित्रकला प्रदर्शनी सुरु गर्यो।
पर्यटन बोर्डका प्रमुख कार्यकारी अधिकृतले कला, संस्कृति र पर्यटन प्रवर्द्धनमा योगदानको आश्वासन दिए।
प्रदर्शनी १० जेठसम्म निःशुल्क खुला रहनेछ र मासिक फोटो प्रतियोगितामा पुरस्कार प्रदान गरिन्छ।

५ जेठ, काठमाडौं । नेपाल पर्यटन बोर्डको नियमित ‘फोटो–नेपाल’ प्रदर्शनी कार्यक्रम अन्तर्गत ‘कुण्डलिनी–२’ शीर्षकमा एकल चित्रकला प्रदर्शनी सुरु भएको छ ।

पर्यटन बोर्डमा आयोजना गरिएको यो १३औं एकल चित्रकला प्रदर्शनी हो । यसपालि भीमप्रसाद शर्माका चित्र प्रदर्शनीमा राखिएको छ । कार्यक्रममा संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेले सिर्जनात्मक प्रदर्शनीले कला, संस्कृति र पर्यटन प्रवर्द्धनमा महत्त्वपूर्ण योगदान पुर्‍याउने बताए ।

पर्यटन बोर्डका प्रमुख कार्यकारी अधिकृत (सीईओ) दीपकराज जोशीले पर्यटन बोर्डले आगामी दिनमा कलाकार र फोटोग्राफरसँग सहकार्य गरी देशको पर्यटन प्रवद्र्धनलाई थप प्रभावकारी बनाउने बताए । प्रदर्शनी १० जेठसम्म निःशुल्क रूपमा सर्वसाधारणका लागि खुला रहने छ ।

बोर्डले सञ्चालन गर्दै आएको फोटो नेपाल अभियान अन्तर्गत बोर्डको पोर्टलमा मासिक फोटो प्रतियोगिता समेत जारी छ । यस प्रतियोगितामा हरेक महिनाका उत्कृष्ट तीन तस्वीरलाई जनही २५ हजार नगद पुरस्कार प्रदान गरिने बोर्डले जनाएको छ ।

नेपालका हिमाल, सांस्कृतिक सम्पदा, प्राकृतिक सौन्दर्य र उजागर नभएका र प्रचार नपुगेका गन्तव्य समेटिएका तस्वीर पठाउन बोर्डले देश–विदेशका फोटोग्राफरलाई आह्वान गरेको छ ।

बोर्डले सन् २०१६ फेब्रुअरीदेखि सुरु गरेको ‘फोटो–नेपाल’ अभियान अन्तर्गत हालसम्म १ सयभन्दा बढी कला तथा फोटो प्रदर्शनी सफलतापूर्वक सम्पन्न गरिसकेको छ ।