२०८२ जेठ ९ गते १७:४६ 
News Summary
Generated by OK AI. Editorially reviewed.- श्रीलंकाका एन्जेलो म्याथ्युजले जुन १७ देखि गालेमा हुने टेस्टपछि सन्यास लिने भएका छन् ।
- उनीले २००९ देखि सुरु भएको आफ्नो टेस्ट करियरको अन्त्य गर्ने बताए।
- म्याथ्युजले वान डे र टी–२० मा खेल्न तयार रहेको र युवा खेलाडीलाई अवसर दिन चाहेको बताए।
९ जेठ, काठमाडौं । श्रीलंकाका भेट्रान अलराउण्डर एन्जेलो म्याथ्युजले टेस्ट क्रिकेटबाट सन्यास लिने घोषणा गरेका छन्। उनले आगामी जुन १७ देखि गाल्लेमा सुरु हुने बंगलादेशविरुद्धको पहिलो टेस्टपछि आफूले लामो समय खेलेको टेस्ट यात्रा अन्त्य गर्ने जनाएका छन्।
म्याथ्युजको टेस्ट करियर पनि २००९ मा यही गाले मैदानबाट सुरु भएको थियो। ३८ वर्षे म्याथ्युजले सामाजिक सञ्जालमार्फत भनेका छन्, ‘अन्तर्राष्ट्रिय टेस्ट क्रिकेटबाट बिदा हुने समय आएको छ। मैले क्रिकेटलाई सबैथोक दिएको छु, र क्रिकेटले पनि मलाई जीवनमा सबैथोक दिएको छ।’
गाल्ले टेस्ट म्याथ्युजको ११९औं टेस्ट खेल हुनेछ, जसमा ३४ खेल उनले कप्तानको रूपमा खेलेका थिए। उनले अहिलेसम्म टेस्टमा १६ शतक र एक दोहोरो शतक (नटआउट २००) सहित ८१६७ रन बनाएका छन् ।
श्रीलंकाका लागि टेस्टमा सर्वाधिक रन बनाउने सूचीमा उनी कुमार संगकारा र माहेला जयवर्धनेपछि तेस्रो स्थानमा छन्। बलिङमा पनि उनले ३३ विकेट लिएका छन्।
म्याथ्युजको करियरको उत्कृष्ट समय सन् २०१३ देखि २०१५ को बीचमा रह्यो, जहाँ उनले लगातार उच्च औसतका साथ रन बनाउँदै श्रीलंकाका लागि महत्वपूर्ण जितहरू दिलाए। इंग्ल्यान्डको हेडिङ्ले मैदानमा दोस्रो इनिङ्समा बनाएको १६० रन उनको स्मरणीय पारीहरूमध्ये एक हो।
हालैका वर्षहरूमा पनि उनले सानदार प्रदर्शन गर्दै २०२२ र २०२३ मा औसत ५० भन्दा माथि कायम राखेका थिए। उनले आफ्नो अन्तिम टेस्ट शतक २०२४ मा अफगानिस्तानविरुद्ध बनाएका थिए।
टेस्ट क्रिकेटबाट बिदा लिँदै गर्दा म्याथ्युजले वान डे र टी–२० मा भने आफू देशको आवश्यकता अनुसार खेल्न तयार रहेको बताएका छन्।
‘मैले अब युवा खेलाडीलाई अवसर दिनुपर्छ भन्ने महसुस गरेको छु। यो टिममा भविष्यका र वर्तमानका धेरै स्टार खेलाडी छन्’ म्याथ्युजले भनेका छन्।
प्रतिक्रिया 4