२०८२ जेठ १२ गते ७:५२ 
News Summary
Generated by OK AI. Editorially reviewed.- लाहोर कलन्दर्सले पाकिस्तान सुपर लिगको उपाधि जितेको छ।
- परेराले ६२ र सिकन्दर राजाले २२ रन बनाएर जित सुनिश्चित गरे।
- क्वेटाले २०१ रन बनाएको थियो, हसन नवाजले ७६ रन सहित उत्कृष्ट प्रदर्शन गरे।
१२ जेठ, काठमाडौं । कुशल परेरा र सिकन्दर राजाको फिनिसिङमा बलियो लक्ष्य पछ्याउँदै लाहोर कलन्दर्सले पाकिस्तान सुपर लिग (पीएसएल) क्रिकेटको उपाधि जितेको छ ।
आइतबार भएको फाइनलमा लाहोरले क्वेट्टा ग्लाडिएटर्सलाई ६ विकेटले हराएको हो । २०२ रनको लक्ष्य लाहोरले १ बल बाँकी छँदा ४ विकेटको क्षतिमा पूरा गर्यो ।
लाहोरका लागि परेराले अविजित रहँदै ६२ रन बनाए भने सिकन्दर राजा ७ बलमा २२ रनमा अविजित रहे । अन्तिम ओभरमा १३ रन आवश्यक रहँदा सिकन्दरले चौथो बलमा छक्का र पाँचौ बलमा चौका प्रहार गरे ।
त्यसअघि अघिल्लो ओभरमा परेराले छक्का र चौकासहित राजासँग मिलेर कुल १८ रन जोडेपछि जित सहज बनेको थियो । क्वेटाका मोहम्मद आमिर, फहीम अशरफ, अबरर अहमद र उस्मान तरिकले १-१ विकेट लिए ।
त्यसअघि टस जितेर पहिले ब्याटिङ गरेको क्वेटाले २० ओभरमा ९ विकेट गुमाएर २०१ रन बनाएको थियो । हसन नवाजले सर्वाधिक ७६ रन बनाए । अभिष्का फर्नान्डोले २९ तथा फहीम अशरफले २८ रन बनाए ।
लाहोरका शाहीन अफ्रिदीले ३ विकेट लिँदा सलमान मिर्जा र हारिस राउफले २-२ तथा सिकन्दर राजा र रिशाद होसेनले १-१ विकेट लिए ।
प्रतिक्रिया 4