२०८२ जेठ १२ गते २३:४१ 
News Summary
Generated by OK AI. Editorially reviewed.- पञ्जाब किङ्सले आईपीएल २०२५ को पहिलो क्वालिफायरमा स्थान पक्का गरेको छ।
- मुम्बई इन्डियन्सलाई हराउँदै पञ्जाब शीर्ष २ मा पुग्यो।
- अर्को टोलीको टुंगो मंगलबारको अन्तिम लिग खेलपछि लाग्नेछ।
१२ जेठ, काठमाडौं । पञ्जाब किङ्सले इन्डियन प्रिमियर लिग आईपीएल २०२५ को पहिलो क्वालिफायरमा स्थान पक्का गरेको छ । सोमबार अन्तिम लिग खेलमा मुम्बई इन्डियन्सलाई ७ विकेटले हराउँदै पञ्जाबले शीर्ष २ भित्र फिनिस गर्ने पक्का भएको हो ।
मुम्बईले दिएको १८५ रनको लक्ष्य पञ्जाबले १८.३ ओभरमा ३ विकेटको क्षतिमा भेट्टायो । पञ्जाबका लागि जोश इङ्लिसले सर्वाधिक ७३ तथा प्रियान्श आर्याले ६२ रन बनाए ।
इङ्लिस र प्रियान्श मिलेर दोस्रो विकेटका लागि १०९ रनको शतकीय साझेदारी गरेका थिए । कप्तान श्रेयस अय्यर २६ रनमा नटआउट रहे ।
मुम्बईका लागि मिचेल सान्टनरले २ तथा जसप्रित बुमराहले १ विकेट लिए ।
त्यसअघि टस हारेर पहिले ब्याटिङको निम्तो पाएको मुम्बईले २० ओभरमा ७ विकेट गुमाएर १८४ रन बनाएको थियो । सुर्यकुमार यादवले सर्वाधिक ५७ रन बनाए । रायन रिकेल्टनले २७ तथा हार्दिक पाण्ड्याले २६ रन बनाए ।
पञ्जाबका लागि अर्शदीप सिंहले ४ ओभरमा २८ रन दिएर २ विकेट लिए । मार्को यानसेनले ४ ओभरमा ३४ रन दिएर २ विकेट लिए । विजयकुमार वाइशाकले २ पनि विकेट लिँदा हरप्रीत ब्रारले १ विकेट हात पारे ।
जितपछि १४ खेलमा १९ अंकसहित पञ्जाब शीर्षस्थानमा उक्लिएको छ । यस हारपछि मुम्बईले भने चौथो स्थानमा रहेर इलिमिनेटर खेल्नेछ ।
शीर्ष २ मा पर्ने अर्को टोलीको टुंगो मंगलबार लखनउ र बेंगलुरुबीच हुने अन्तिम लिग खेलपछि लाग्नेछ ।
उक्त खेलमा बेंगलुरु विजयी भएमा पहिलो क्वालिफायर खेल्नेछ भने पराजित भएमा गुजरात टाइटन्स पहिलो क्वालिफायरमा प्रवेश गर्नेछ ।
प्रतिक्रिया 4