संसद सचिवालयको सचिवमा दुराको बढुवा

News Summary

Generated by OK AI. Editorially reviewed.

संसद सचिवालय सचिव पदमा सुरजकुमार दुरा बढुवा भएका छन्, सचिवालय सञ्चालन समितिले निर्णय गरेको हो।
दुरा २०५२ देखि संसद सचिवालयमा सेवा गर्दै आएका छन् र हाल राज्यव्यवस्था समितिका सचिव हुन्।
सभामुख देवराज घिमिरे र राष्ट्रिय सभा अध्यक्ष नारायण प्रसाद दाहालले दुरालाई बधाई दिएका छन्।

३१ जेठ, काठमाडौं । संघीय संसद सचिवालयको रिक्त सचिवालय सचिव पद्‌मा सुरजकुमार दुराको बढुवा भएको छ ।

सभामुखको अध्यक्षतामा शनिबार बसेको सचिवालय सञ्चालन तथा व्यवस्थापन समितिको बैठकले दुरालाई सचिवालय सचिवमा बढुवा गर्ने निर्णय गरेको हो ।

लोकसेवा आयोगको अध्यक्षतामा रहेको बढुवा समितिले दुई दिनअघि दुरासहित मनोजकुमार गिरी र हृदयराम महर्जनलाई बढुवा गर्न सिफारिस गरेको थियो ।

सचिवालय सचिव सुदर्शन खड्काले राजीनामा दिएसँगै संसद सचिवालयमा एक सचिवालय सचिव पद रिक्त थियो ।

कैलालीको धनगढी उपमहानगरपालिका १ शान्तिनगरमा २०२७ साल माघ ७ गते बुवा गणेशबहादुर र आमा यमुनादेवीको कोखबाट जन्मिनुभएका दुरा २०४६ साल फागुन १९ गते निजामती सेवामा प्रवेश गर्नुभएको थियो ।

२०५२ सालदेखि उनले लगातार संघीय संसद सचिवालयमा सेवा गर्दै आएका छन् ।

राजनीतिशास्त्र र समाजशास्त्रमा स्नातकोत्तर गरेका दुराले संसद सचिवालयमा प्रशासन महाशाखा, संसदीय समितिको सचिवलगायतका महत्त्वपूर्ण जिम्मेवारी निर्वाह गरेका छन् । उनी हाल राज्यव्यवस्था तथा सुशासन समितिको सचिव छन् ।

दुराले शनिबार नै सिंहदरवारस्थित कार्यालयमा पदबहाली गरेका छन् । नवनियुक्त सचिव दुरालाई सभामुख देवराज घिमिरे, राष्ट्रिय सभा अध्यक्ष नारायण प्रसाद दाहाल लगायतका पदाधिकारीले बधाई तथा सफल कार्यकालको शुभकामना दिए ।