एन्फा यू-१६ युथ लिगको तयारी पूरा, विजेतालाई १ लाख पुरस्कार

१९ असार, काठमाडौं । अखिल नेपाल फुटबल संघ (एन्फा) को आयोजनामा यही असार २० गतेदेखि सुरु हुने यु-१६ युथ लिगको तयारी पूरा भएको छ । एन्फाले बिहीबार पत्रकार सम्मेलन गरेर प्रतियोगिताको तयारीबारे जानकारी गराएको हो ।

फिफाको ट्यालेन्ट डेभलपमेन्ट स्किम (टीडीएस) अन्तर्गत आयोजना हुने यो प्रतियोगिता डबल राउन्ड रोबिन प्रणालीमा खेलाइनेछ। खेलहरू एन्फा कम्प्लेक्समा आयोजना गरिनेछ भने आवश्यक परेमा दशरथ रंगशालामा पनि खेल हुन सक्ने जनाइएको छ।

प्रतियोगितामा ए डिभिजनका क्लबहरू सहभागी हुनेछन्। थ्रीस्टार क्लब बाहिरिएको छ भने एपीएफ क्लबले सहभागिता जनाउनेछ। बी डिभिजनबाट ए डिभिजनमा बढुवा भएका प्लानिङ ब्वाइज र श्री भगवती क्लब पनि सहभागी हुनेछन्। उद्घाटन खेल श्री भगवती र मनाङ मर्स्याङ्दी क्लबबीच शुक्रबार हुनेछ।

विजेता टोलीलाई ट्रफी सहित १ लाख रुपैयाँ, उपविजेतालाई ५० हजार रुपैयाँ पुरस्कार प्रदान गरिनेछ। व्यक्तिगत विधामा उत्कृष्ट प्रदर्शन गर्ने खेलाडीहरूलाई जनही १५ हजार रुपैयाँ दिइनेछ। फेयर प्ले टिमलाई पनि १५ हजार रुपैयाँ पुरस्कार प्राप्त गर्नेछ।

प्रतियोगितामा सहभागी प्रत्येक टोलीलाई तयारी खर्चका लागि ३ लाख ५० हजार रुपैयाँ दिइने जनाइएको छ। प्रतियोगिताको अनुमानित कुल बजेट १ करोड २ लाख ३६ हजार ३३० रुपैयाँ रहेको छ। फिफाबाट ५० हजार डलर प्राप्त हुनेछ भने बाँकी खर्च एन्फाले आफ्नै स्रोतबाट व्यवस्थापन गर्ने बताइएको छ।

एन्फाका प्रवक्ता सुरेश शाहले प्रतियोगिता विकासात्मक उद्देश्यले आयोजना गरिएको बताउँदै यसबाट नयाँ प्रतिभा फेला पर्ने आशा गरिएको बताए। पुरस्कार कम भएको भन्ने गुनासोबारे उनले पुरस्कारभन्दा पनि युवाहरूलाई अवसर दिनु मुख्य उद्देश्य भएको प्रष्ट पारे। उनका अनुसार यस्ता प्रतियोगिताबाट भविष्यमा राष्ट्रिय टोलीका खेलाडी उत्पादन हुने विश्वास एन्फाले राखेको छ।

प्रतियोगिताका सबै खेलहरू एन्फा टिभी युट्युब च्यानलमार्फत प्रत्यक्ष प्रसारण गरिनेछ।