दुर्गेशको नयाँ गीत ३ दिनमै युट्युब म्युजिकको ‘ग्लोबल ट्रेन्डिङ’मा

काठमाडौं । दुर्गेश थापा र सिसन बानियाँको नयाँ गीत ‘जाने भए जाम माया’ले नेपाल मात्र होइन केही विदेशी मुलुकको युट्युब भ्यूजमा समेत उछाल ल्याएको छ ।

रिलिजको २४ घण्टाभित्र सर्वाधिक हेरिने नेपाली गीतको रेकर्ड रचेको यो गीत अमेरिकामा केही दिनअघि युट्युब ट्रेन्डिङमा आउने पहिलो नेपाली गीत बन्यो । अस्ट्रेलियामा ट्रेन्डिङको शीर्षस्थानमा आउने पहिलो नेपाली गीत समेत बन्यो ।

रिलिजको तीन दिनमै यसले अर्को रेकर्ड रचेको छ । त्यो हो- सबैभन्दा छिटो युट्युब म्युजिकको ग्लोबल ट्रेन्डिङमा आउने कीर्तिमान । रिलिजको ३ दिनमै यो गीत ४० लाख भ्यूज बटुल्दै युट्युब म्युजिकको ग्लोबल ट्रेन्डिङमा समावेश भएको छ ।

यो समाचार लेख्दासम्म यो गीत युट्युब म्युजिकको ‘ग्लोबल डेली टप म्युजिक भिडियोज’को १० औं स्थानमा स्ट्रिमिङ भैरहेको छ । शनिबार दिउँसो यो गीत सूची अपडेट भएको हो । दुर्गेशले यो उपलब्धिका लागि सामाजिक संजालमार्फत प्रशंसकलाई धन्यवाद दिएका छन् ।

यसअघि अन्य गीत युट्युब म्युजिकको ग्लोबल ट्रेन्डिङमा आउन केही साता लाग्थ्यो । दुर्गेशको अघिल्लो गीत ‘दुश्मन हेरेको हेर्‍यै’ युट्युब म्युजिक र ‘टप हन्ड्रेड म्युजिक भिडियोज ग्लोबल’ दुबै सूचीमा समावेश भैसकेको छ । नयाँ गीत भने ‘टप हन्ड्रेड म्युजिक भिडियोज ग्लोबल’ सूचीमा शनिबार बेलुकासम्म आइसकेको छैन ।

युट्युबले पछिल्लो २४ घण्टामा धेरै पटक हेरिने भाइरल गीतलाई भ्यूजको आधारमा ‘ग्लोबल डेली टप म्युजिक भिडियोज’को सूचीमा समावेश गर्छ । पछिल्लो समय उत्कृष्ट पर्फमेन्स गर्ने ट्रेन्डिङ कन्टेन्ट र दैनिक भ्यूजमा आधारमा युट्युब म्युजिकले यो सूची तयार पार्छ ।

यो पनि पढ्नुहोस

दुर्गेश थापाको ‘दुश्मन हेरेको हेर्‍यै’ युट्युब म्युजिकको ग्लोबल ट्रेन्डिङमा

यो पनि पढ्नुहोस

दुर्गेशको नयाँ गीतले राख्यो २४ घण्टाभित्र युट्युबमा धेरै हेरिने नेपाली गीतको रेकर्ड

‘टप हन्ड्रेड म्युजिक भिडियोज् ग्लोबल’को सूची भने साप्ताहिकरुपमा अपडेट हुने गर्छ । यसमा सर्वकालिन समय र भ्यूजका गीत पनि समेटिन्छन् ।

दुर्गेश युट्युब म्युजिकको लिस्टमा सर्वाधिक २ पटक समेटिने नेपाली संगीतकर्मी बनेका छन् । यसअघि यो लिस्टमा सुशान्त केसी, एकदेव लिम्बु, एसडी योगी र बाबुकृष्ण परियारको ‘कश्मिरे पछ्यौरी’ एक एक पटक समेटिएका छन् ।