जीवन लुइँटेल ‘नाइँ नभन्नु ल ७’बाट फिल्ममा फर्किन लागेका हुन् ?

News Summary

Generated by OK AI. Editorially reviewed.

अभिनेता जीवन लुइँटेलले साउन पहिलो साता कान्तिपुर थिएटरमा नाटक 'शिरिषको फूल'को मंचन गर्ने तयारी गरिरहेका छन्।
जीवनले निर्देशक विकास आचार्यसँग फिल्म श्रृंखला 'नाइँ नभन्नु ल ७' मा पुनरागमनको प्रारम्भिक छलफल गरिरहेका छन्।
उहाँले सन् २०२५ बाट फिल्मबाट पुनरागमन गर्ने बताउनुभयो र निकट भविष्यमै 'नाइँ नभन्नु ल ७' हेर्न पाइने सम्भावना छ।

काठमाडौं । अभिनेता तथा ‘मिस्टर नेपाल’ जीवन लुइँटेल यतिबेला नाटक खेल्न नेपाल आइपुगेका छन् । उनले अभिनय गर्ने नाटक ‘शिरिषको फूल’को मंचन साउन पहिलो साता कान्तिपुर थिएटरमा सुरु गर्ने तयारी छ ।

उनले यो नाटकबाट ७ वर्षपछि अभिनयमा पुनरागमन गर्दैछन् । तर, फिल्म चाहिँ कहिले त ? यसबारे पनि नयाँ खबर छ । जीवनले अनलाइनखबरसँग फिल्ममा पुनरागमनको तयारीबारे ‘एक्सक्लुसिभ’ कुरा खुलाएका छन् ।

यतिबेला निर्देशक विकास आचार्य र जीवनबीच बहुचर्चित फिल्म श्रृंखला ‘नाइँ नभन्नु ल ७’लाई लिएर कुरा भैरहेको छ । जीवन नेपाल आएलगत्तै निर्देशक आचार्यले जीवनसँग यो फिल्मलाई लिएर प्रारम्भिक छलफल अघि बढाएका छन् । जीवन पनि यसप्रति सकारात्मक छन् ।

‘विकास दाईसँग कुरा भएको छ । हामी यसबारे थप अघि बढ्छौं’ जीवनले अनलाइनखबरसँग भने ।

हामीसँगको कुराकानीमा जीवनले सन् २०२५ वर्षबाटै आफूले फिल्मबाट पुनरागमन गर्ने बताइसकेका छन् । सबै कुरा ठीकठाक भए, हामीले निकट भविष्यमै ‘नाइँ नभन्नू ल ७’ हेर्न पाउनेछौं । जीवनलाई यतिबेला अन्य फिल्मबाट समेत प्रस्ताव आइरहेको छ ।

जीवनले ‘नाइँ नभन्नू ल’को पहिलो र दोस्रो भागमा अभिनय गरेका थिए । जुन निकै हिट भएको थियो । विकास यतिबेला कथामा केही ‘सिनेम्याटिक लिबर्टी’ लिएर सातौं श्रृंखला बनाउने तयारीमा छन् ।

३३ फिल्ममा अभिनय गरेका जीवनको पछिल्लो फिल्म ‘सुकुलगुण्डा’ सन् २०१८ मा रिलिज भएको थियो ।