२०८२ साउन १ गते १७:५७ 
News Summary
Generated by OK AI. Editorially reviewed.- कर्नाटक सरकारले एम चिन्नास्वामी रंगशाला बाहिरको भागदौड घटनाका लागि रोयल च्यालेन्जर्स बेंगलुरु (आरसिबी)लाई जिम्मेवार ठहर गरेको छ।
- सरकारी प्रतिवेदनअनुसार आरसिबीले विजय समारोहको निर्णय पुलिससँग सल्लाह नगरी अनुमति नलिई गरेको थियो र भिड व्यवस्थापनका लागि तयारी गर्न पर्याप्त समय थिएन।
- सरकारले प्रहरी अधिकारी विकास कुमार लगायत पाँच जनाको निलम्बन फिर्ता गर्ने ट्रिब्युनलको आदेशलाई चुनौती दिएको छ र सीआइडीको अनुसन्धान अन्तिम चरणमा छ।
१ साउन, काठमाडौं । कर्नाटक सरकारले गत जुन ४ मा एम चिन्नास्वामी रंगशाला बाहिर भएको भागदौडको घटनाका लागि रोयल च्यालेन्जर्स बेंगलुरु (आरसिबी)लाई जिम्मेवार ठहर गरेको छ। यस घटनामा ११ जनाको मृत्यु भएको थियो भने ५० भन्दा बढी घाइते भएका थिए।
यो निष्कर्ष बिहीबार सार्वजनिक गरिएको सरकारी प्रतिवेदनमा आएको हो। यसअघि उच्च अदालतले सरकारको गोप्य राख्ने अनुरोध अस्वीकार गर्दै प्रतिवेदन सार्वजनिक गर्न आदेश दिएको थियो।
प्रतिवेदनअनुसार, आरसिबीले आफ्नो इभेन्ट पार्टनर डीएनए नेटवर्क प्रालि र कर्नाटक स्टेट क्रिकेट एसोसिएसनसँग मिलेर विजय समारोहको निर्णय पुलिससँग सल्लाह नगरी र अनुमति नलिई गरेको थियो।
जुन ३ अर्थात् फाइनल खेलको साँझ ६:३० बजे मात्र आरसिबीले फाइनल जितेमा विजय यात्राको आयोजना हुने पुलिसलाई जानकारी दिइएको भनिएको छ। तर पुलिसले पर्याप्त जानकारी नपाएको र छोटो समय भएकाले अनुमति नदिएको प्रतिवेदनमा उल्लेख छ।
तर पनि आरसिबी ले जुन ४ को बिहान ७:०१ बजे आफ्नो सामाजिक सञ्जालमा विदान सौधाबाट रंगशालासम्म विजय यात्राको घोषणा गर्यो। यसमा विराट कोहलीले फ्यानसँग सेलिब्रेट गर्ने भनिएको भिडियो पनि सामेल थियो, जसले ठूलो संख्यामा भीड आकर्षित गर्यो।
सरकारले भनेको छ, ‘मात्र जानकारी दिइएको थियो, तर अनुमति लिन आवश्यक प्रक्रिया पूरा गरिएको थिएन।’ प्रतिवेदनले स्पष्ट पार्छ कि भिड व्यवस्थापनका लागि तयारी गर्न पर्याप्त समय थिएन।
यसैबीच, सरकारले प्रहरी अधिकारी विकास कुमार लगायत पाँच जनाको निलम्बन फिर्ता गर्ने ट्रिब्युनलको आदेशलाई चुनौती दिएको छ। सरकारका अनुसार, १२ घण्टामै यस्तो ठूलो भीड नियन्त्रण गर्न असम्भव थियो।
यस घटनाबारे सीआइडीको अनुसन्धान अन्तिम चरणमा छ भने आरसिबीका शीर्ष अधिकारी र डीएनएका प्रतिनिधिहरूले बयान दिएका छन्। फैसला कहिले आउने भन्ने अझै तय भएको छैन।
प्रतिक्रिया 4