खेम सेन्चुरी अस्पताल भर्ना, एयरपोर्टबाटै केएमसी लगियो

News Summary

Generated by OK AI. Editorially reviewed.

संगीतकार खेम सेन्चुरीको स्वास्थ्य समस्या भएपछि त्रिभुवन अन्तर्राष्ट्रिय विमानस्थलमा अस्पताल भर्ना गरिएको छ।
केएमसी अस्पतालमा परीक्षण गर्दा सेन्चुरीलाई पत्थरी देखिएको छ र उपचार अघि बढाइने छ।
सेन्चुरी क्यानडामा सांगीतिक प्रस्तुति दिन जाने तयारीमा थिए र अहिले 'भ्वाइस किड्स'का कोच हुन्।

काठमाडौं । क्यानडा उड्न लागेका संगीतकार खेम सेन्चुरीको स्वास्थ्यमा अचानक समस्या भएपछि अस्पताल भर्ना गरिएको छ । बोर्डिङ पास लिएर त्रिभुवन अन्तर्राष्ट्रिय विमानस्थलभित्र जहाज कुरिरहेको बेला उनको स्वास्थ्य असहज बनेको थियो ।

विमानस्थलमा प्रारम्भिक स्वास्थ्य जाँच गर्दा अस्पताल लैजान सिफारिस गरिएपछि एम्बुलेन्समा हालेर उनलाई विहिबार बेलुका सिनामंगलको केएमसी अस्पताल लगिएको थियो । त्यहाँ परीक्षण गर्दा पत्थरी (स्टोन) देखिएको सेन्चुरीसँगै अस्पतालमा रहेका गीतकार नेत्र अर्यालले जनाए ।

अहिले सेन्चुरीलाई केएमसीमा भर्ना गरिएको छ । शुक्रबार बिहानसम्म रिपोर्टको नतिजा आएपछि उपचार अघि बढाइने जनाइएको छ । ‘भ्वाइस अफ नेपाल’का निर्देशक लक्ष्मण पौड्यालले पनि सेन्चुरीलाई स्टोन देखिएको बताए ।

गीतकार अर्यालले अहिले सेन्चुरीको स्वास्थ्यमा सुधार आइरहेको बताएका छन् । सेन्चुरी क्यानडामा सांगीतिक प्रस्तुति दिन त्यता जाने तयारीमा थिए । उनी अहिले प्रसारण भैरहेको ‘भ्वाइस किड्स’का कोच र ब्यस्त संगीतकार पनि हुन् ।