केपी-विद्या : बिझाउन थाले ‘लालगेडी’

१३ भदौ, काठमाडौं । प्रधानमन्त्री एवं एमाले अध्यक्ष केपी शर्मा ओलीले बुधबार साँझ काठमाडौं उपत्यकाका नेताहरूसँग बालुवाटारमा भएको छलफलमा विद्या भण्डारीबारे टिप्पणी गर्ने क्रममा ‘लालगेडी’ को बिम्ब प्रयोग गरे ।

‘लालगेडी’ नापतौल प्रणालीअनुसार सुन तौलँदा प्रयोग गरिने मापक वस्तु हो । यो मिहिन ढंगले फलेको कालो थोप्लो भएको ‘सुन्दर गेडी’ हो । त्यसैले सबैको प्यारो हुन खोज्ने स्वभावबारे बिम्ब प्रयोग गर्दा ‘लालगेडी’को उदाहरण दिने चलन छ ।

कुनै समय एमालेभित्र केपी र विद्या एकअर्काका लागि आँखामा राख्दा समेत नबिजाउने ‘लालगेडी’ जस्ता थिए । पार्टिभित्रको अन्तरसंघर्षमा एक अर्कालाई सघाउँथे । केपी प्रधानमन्त्री र विद्या राष्ट्रपति हुँदा शासकीय सत्ता नै एकअर्काबीच मिलेर चलाए । दुवैले गरेका निर्णयहरुलाई एकअर्काले बोकेर हिँडे । तर अहिले एक अर्कोको सम्बन्ध लालगेडी होइन दिनप्रतिदिन आँखामा छिरेको ‘कसिंगर’ जस्तो हुँदैछ ।

ओलीले अहिले विद्याले चाल्न खोजेको कदम र शैलीबारे टिप्पणी गर्दै बुधबार भने- ‘किनभने उहाँबाट चल्न सक्दैन । लालगेडी भएर त चल्दैन नि, यो त संघर्षको मैदान हो नि । सबैको आँखामा नबिजाउने लालगेडी भएर चल्छ आन्दोलन ?’

अहिले एक अर्काबीच आपसी टिप्पणी गर्ने क्रम बढेको छ । ओलीले पार्टी सदस्य समेत बन्न अयोग्य रहेको निर्णय पार्टीबाट गराएका छन् । विद्या अहिले छुट्टै कार्यालय खोलेर आफ्नो अभियान चलाउन थालेकी छन् । उनले गत साता सम्पर्क कार्यालय उद्घाटन गर्दै भनिन्- मेरो संगठित सदस्यताकै प्रश्न उठाएको छ, यो च्यासलले । मैले सदस्यता लिँदा एमाले जन्मिएकै थिएन ।’

दुवैको सम्बन्धको तिक्तताको सीमा यसरी नाघ्दै छ कि, विगतमा आफैंले दिएका अभिव्यक्तिको समेत खण्डन भइरहेको हेक्का छैन । के निर्णय गरिएको र बोल्दा के तर्क गरिँदैछ त्यसको सिलसिला पनि टुट्न थालेको छ । यो मामिलामा अध्यक्ष ओली मुखर छन्

पूर्वराष्ट्रपति विद्यादेवी भण्डारीबारे निर्णय लिन नेकपा एमालेले आधार मानेको तथ्य खण्डित हुनेगरी बुधबार ओलीले दिएका अभिव्यक्तिहरू सार्वजनिक भए ।

६ साउनमा सम्पन्न केन्द्रीय कमिटी बैठकमा ओलीले गणतन्त्रको सुदृढीकरण र राष्ट्रपति पदको गरिमा जोगाउन भण्डारीलाई सक्रिय राजनीतिमा आउन रोक लगाउनुपर्ने र पार्टी सदस्यता नवीकरण नहुने निर्णय सुनाएका थिए । १२ साउनमा जारी अपानि-१२, मा पनि यही तर्क उल्लेख छ ।

‘सम्माननीय पूर्वराष्ट्रपति विद्यादेवी भण्डारी राष्ट्रकै गौरवका रुपमा सम्मानित भएर बस्नु पर्दछ । सक्रिय राजनीतिमा आउनु हुन्न’ अपानिमा लेखिएको छ, ‘सिंगै राष्ट्रको नेता भएको व्यक्तिलाई नेकपा एमालेले कार्यकर्ता बनाउनु हुँदैन । अध्यक्ष भए पनि कार्यकर्ता हो । यहाँ आउनु हुँदैन । पूर्वराष्ट्रपति सम्मानपूर्वक राष्ट्रको गणतन्त्रको गौरव भएर बस्नुहोस् । उहाँ राष्ट्रको गहना हो । हाम्रो पनि गहना हो ।’

छलफलका निम्ति मातहतका कमिटीहरूमा पठाइएको अपानिकै भाषालाई आधार मानेर संस्थापन पक्षका नेताहरूले विद्या भण्डारीबारे तर्क गरिरहेका छन् । उनीहरूको भनाइ छ, ‘गणतन्त्रको गौरव, राष्ट्रपति संस्थाको गरिमा र विद्या भण्डारीको सम्मानका निम्ति पनि राजनीतिमा रोक लगाउनुपर्छ ।’

अपानिको भाषाप्रति भण्डारी पक्षको चर्को विमति छ । पार्टी सदस्यता नवीकरण नगर्ने निर्णय सच्याउन उनीहरूले वडा, पालिका, जिल्ला र प्रदेश कमिटीहरूमा आवाज उठाइरहेका छन् । यो पक्षका नेताहरूले मिडिया कुराकानीमा समेत भण्डारीलाई अन्याय भएको बताइरहेका छन् ।

यस्तो सन्दर्भमा अध्यक्ष ओलीका दुईवटा भिडियो क्लिप्स सार्वजनिक भए र त्यहाँ अपानिको तर्क खण्डित भएको छ । एउटा भिडियो, ६ असोज २०८० मा पत्रकार ऋषि धमलासँगको अन्तर्वार्ताको अंश हो ।

उक्त भिडियोमा ओलीले प्रष्ट भाषामा पूर्वराष्ट्रपति भण्डारीले चाहे सक्रिय राजनीतिमा आउन सक्ने र एमालेको अध्यक्ष समेत बन्न सक्ने बताएका छन् । पूर्वराष्ट्रपतिले राजनीति गर्न हुन्न भन्नु बेकारको कुरा भएको निष्कर्ष सुनाएका ओलीले भण्डारीलाई निष्क्रिय नबस्न सुझाव समेत दिएका छन् ।

यो भिडियोको प्रसंग नसेलाउँदै शनिबार अर्को भिडियो सार्वजनिक भयो । प्रधानमन्त्रीकै सचिवालयबाट सार्वजनिक १ मिनेट ५९ सेकेण्ड छोटो भिडियोमा ओलीले पूर्वराष्ट्रपति भण्डारीलाई भीम रावल बनाइदिने प्रष्ट चेतावनी दिएका छन् ।

सदस्यता नवीकरण गरिदिए विद्या भण्डारीले आफूविरुद्ध लड्ने, तर नजित्ने हुँदा भीम रावललाई जस्तै कारबाही गरिनुपर्ने नराम्रो परिस्थिति आउने ओलीले बताएका छन् ।

हुन त प्रधानमन्त्रीको सचिवालयले शुक्रबार साँझ प्रकाशित समाचारहरूको खण्डनमा उक्त भिडियो सार्वजनिक गरेको थियो ।

विधान महाधिवेशनमा काठमाडौंबाट प्रतिनिधित्व गर्ने प्रतिनिधि र केन्द्रीय सदस्यहरूलाई शुक्रबार प्रधानमन्त्रीको सरकारी निवासमा बोलाएर झण्डै दुई घण्टा लामो प्रशिक्षणात्मक निर्देशन ओलीले दिएका थिए ।

निर्देशनका क्रममा ओलीले ‘एमालेमा दम भएको व्यक्ति विद्या भण्डारी मात्र रहेको सहित मन्तव्य’ दिएको जानकारी काठमाडौं एमालेका अध्यक्ष दीपक निरौलाले फेसबुकमा पोष्ट गरे । उनको पोष्टलाई आधार मानेर समाचार बन्यो ।

जसको खण्डनमा शनिबार बिहान प्रधानमन्त्रीको सचिवालयले प्रेस नोट जारी गर्‍यो । प्रेस नोट मार्फत् समाचारमा उल्लेखित तथ्यहरूमा असहमति जनाइएको छ । हुनसक्छ, प्रेस नोटले नपुग्ने ठानेर प्रम सचिवालयले भिडियोको अंश सार्वजनिक गर्‍यो ।

‘मैलै पार्टीलाई क्षति पुग्ने ठानेर प्रधानमन्त्रीले भनेका कतिपय कुराहरू फेसबुकमा लेखेको थिइनँ । तर मलाई गलत सावित गर्ने उद्देश्य राख्दा पार्टीलाई क्षति पुग्ने भिडियो सार्वजनिक गरियो’, निरौला भन्छन् ।

प्रम सचिवालयबाट सार्वजनिक भिडियो सेयर गर्दै निरौलाले विद्या भण्डारीलाई भीम रावल बनाइदिने चेतावनी सार्वजनिक गरिनु गलत भनेका छन् । ‘मैले त भीम रावल बनाउने विषय राख्नु राम्रो हुन्न भनेर लेखिनँ, तर दुनियाँलाई सुनाउनुभयो, यसमा थप प्रतिक्रिया छैन मेरो,’ निरौलाले फेसबुकमै लेखेका छन्, ‘एक गल्ती छोप्न खोज्दा अर्को गल्ती नगर्नु होला ।’

यो पनि पढ्नुहोस

संकटमा ओलीको ओत, विद्या सक्रियपछि पर्दैछ चोट

भण्डारी निकट नेताहरू भने प्रधानमन्त्रीको तर्क प्रतिक्रियाकै निम्ति पनि लायक नरहेको बताउँछन् । ‘जस्तो भाषा प्रयोग गर्नुभयो, जे तर्क गर्नुभयो । त्यसको प्रतिक्रिया के हुन्छ ?’ भण्डारी पक्षका नेता विनोद ढकाल भन्छन्, ‘आफ्नो पद जोगाउन जे पनि गर्न तयार छु भन्ने उहाँले सन्देश दिनुभयो ।’

सार्वजनिक भएको भिडियोमा पनि ओलीले पूर्वराष्ट्रपति भण्डारीलाई जसैगरी रोक्नुपर्ने तर्क गरेका छन् । ‘उहाँलाई अध्यक्ष दिन सकिँदैन । अनि उहाँ चुनाव लड्नुभयो भने एकदम निश्चित कुरा के हो भने उहाँ हार्नु हुन्छ । नराम्रोगरी हार्नुहुन्छ,’ ओलीले भनेका छन्, ‘उहाँ हार्नुपर्छ पार्टीको आन्दोलनको हितका लागि । किनभने उहाँबाट चल्न सक्दैन ।’

उक्त भिडियोमा गणतन्त्रको गौरव, राष्ट्रपति संस्थाको गरिमा जस्ता कुरा गरिएको छैन । कुरा हार जितको छ । विद्या भण्डारीले हार्नैपर्ने अनि हारेपछि स्पष्टीकरण सोध्नेदेखि कारबाही गर्नुपर्ने जस्ता प्रक्रियामा जानुपर्ने तर्क ओलीले गरेका छन् ।

भिडियोमा सार्वजनिक ओलीको भनाई जस्ताको तस्तै