प्रधानमन्त्री ओलीले ‘एससीओ’को सदस्य बन्न राष्ट्रपति सीसँग राखे प्रस्ताव

१४ भदौ, काठमाडौं ।  प्रधानमन्त्री केपी शर्मा ओलीले  चीनका राष्ट्रपति सी चिनफिङसँग नेपाललाई शाङ्घाई सहयोग संगठन (एससीओ) को सदस्य बनाउनका लागि सहयोग गर्न प्रस्ताव गरेका छन् । शनिबार बेइजिङमा राष्ट्रपति सीसँग भएको द्विपक्षीय भेटवार्ताका क्रममा  उनले यो प्रस्ताव गरेका हुन् ।

शाङ्घाई सहयोग संगठनकै शिखर सम्मेलनमा सहभागी हुन जाने क्रममा शनिबार उनको बेइजिङमा द्विपक्षीय भेटवार्ता भएको थियो ।

प्रधानमन्त्री ओलीको यो प्रस्तावमा राप्ट्रपति सीले सकारात्मक धारणा राखेका छन् ।

‘चीन नेपालसँग संयुक्त राष्ट्रसंघ र शाङ्घाई सहयोग संगठन लगायतका बहुपक्षीय मञ्चमा सहकार्य गर्न तयार छ,’ राष्ट्रपति सीको भनाइ उद्धृत गर्दै बेइजिङस्थित नेपाली राजदूतावासले जारी गरेको विज्ञप्तिमा छ ।

राष्ट्रपति सीले नेपाललाई समृद्धि यात्रामा सहयोग पुर्‍याउन आफ्नो देश सधैं तयार रहेको बताएका छन् ।  उनले नेपालका विकास प्रयासहरूलाई समर्थन गर्ने प्रतिबद्धता व्यक्त गरे ।

उनले नेपाल–चीन सम्बन्ध ‘शान्तिपूर्ण सहअस्तित्वका पाँच सिद्धान्त’मा आधारित रहेकाले दुवै देशबीचको मित्रता अझ मजबुत हुँदै आएको बताए ।

राष्ट्रपति सी ले नेपाललाई ‘समृद्ध नेपाल, सुखी नेपाली’को आकांक्षा पूरा गर्न समर्थन गर्ने उल्लेख गरे ।

भेटमा प्रधानमन्त्री ओलीले नेपाल–चीनबीच पहिले नै सहमति भएका परियोजना, बीआरआई अन्तर्गतका कार्यक्रमहरूलाई शीघ्र कार्यान्वयन गर्न आग्रह गरेका थिए ।

यसको जवाफमा राष्ट्रपति सीले ‘एक चीन नीति’प्रति नेपालले देखाएको दृढ प्रतिबद्धताप्रति धन्यवाद दिँदै नेपाल–चीनबीच सहमत  भएका बीआरआई अन्तर्गतका परियोजनाहरू छिट्टै कार्यान्वयन गर्ने प्रतिबद्धता पनि दोहोर्‍याएका थिए ।

प्रधानमन्त्री ओलीले सीसँग मल, पेट्रोलियम अन्वेषण, मानव स्रोत विकास, जलवायु प्रतिरोधात्मक क्षमता वृद्धि तथा जनस्तरको सम्बन्ध विस्तारमा चीनको सहयोग आवश्यक रहेको भन्दै ध्यानकर्षण गराएका थिए ।

भेटवार्तामा दुवै नेताले नेपाल–चीन सम्बन्धका विभिन्न पक्षहरूबारे छलफल गर्दै भविष्यमा पारस्परिक लाभदायी सहकार्यलाई अघि बढाउने प्रतिवद्धता जनाएको विज्ञप्तिमा छ ।

प्रधानमन्त्री ओलीले नेपालको विकास प्रयासमा चीनले दिँदै आएको निरन्तर सहयोगप्रति आभार प्रकट गर्दै शाङ्घाई सहयोग संगठनको  शिखर सम्मेलनको सफलताका लागि शुभकामना व्यक्त गरे ।

ओलीले भारत–चीनबीच हालै लिपुलेक हुँदै व्यापार गर्ने समझदारीमा नेपालको कडाभन्दा कडा आपत्ति रहेको कुरा पनि चिनियाँ राष्ट्रपति सीलाई जानकारी गराका थिए । उनले सो भूभाग नेपालकै भएको स्पष्ट पार्दै नेपाल सरकारको दृढ विरोध दर्ता भएको बताएको राजदूतावासद्वारा जारी विज्ञप्तिमा छ ।

प्रधानमन्त्री ओली र उनको टोली आजै अपराह्न तियानजिन पुगेको छ । तियानजिन बिन्हाई अन्तर्राष्ट्रिय विमानस्थलमा उनलाई चीनका उच्च अधिकारीहरूले स्वागत गरेका थिए।

प्रधानमन्त्री ओलीले शाङ्घाई सहयोग संगठन शिखर सम्मेलनको क्रममा विश्वका विभिन्न नेताहरूसँग भेटघाट गर्ने कार्यक्रम छ । आइतबार प्रधानमन्त्री ओली राष्ट्रपति सी चिनफिङ र उनकी पत्नी पेङ लियुआनले आयोजना गर्ने स्वागत भोज र सांस्कृतिक कार्यक्रममा पनि   सहभागी हुनेछन् ।

यो पनि पढ्नुहोस

‘नेपालको चासोमा चीनको सकारात्मक रेस्पोन्स छ’