नागरिकको चाहना बुझ्ने नेता चुनिनुपर्छ : मदनकृष्ण श्रेष्ठ

News Summary

Generated by OK AI. Editorially reviewed.

कलाकार मदनकृष्ण श्रेष्ठले फेसबुकमा लेख्दै भ्रष्टाचारी थुनिनुपर्ने र नेता नागरिकको चाहना बुझ्ने हुनुपर्ने धारणा राखेका छन्।
उनी भन्छन्, 'अबको समयले युवा पुस्तालाई नै नेतृत्वको जिम्मा दिनुपर्छ किनभने समयको प्रतिनिधित्व युवाहरूले गरेको हुन्छ।'
मदनकृष्ण श्रेष्ठले नेपालीहरू एकजुट भएर भ्रष्टाचाररहित शासन पद्धति अपनाउँदै नयाँ नेपाल बनाउने समय आएको बताएका छन्।

काठमाडौँ । कलाकार मदनकृष्ण श्रेष्ठले नागरिकको चाहना बुझ्ने नेता चुनिनुपर्ने बताएका छन् । फेसबुकमा लामो स्टाटस लेख्दै उनले भ्रष्टाचारी थुनिनुपर्ने धारणा राखेका छन् ।

‘देश र समयले अहिले परिवर्तन चाहिरहेको छ । ५० वर्ष पहिलेका युवाहरू भन्दा अहिलेका युवाहरू धेरै शिक्षित र बौद्धिक छन्’ उनी लेख्छन्, ‘समयअनुसार नहिँड्नेहरुलाई समयले छोडिदिन्छ भन्ने कुरा त हामी सबैले प्रस्टैसँग देख्यौँ । हामीले आफ्नो समयमा समयले अह्राएको कामहरू गर्‍यौँ । अबको यो समयले युवा पुस्तालाई नै नेतृत्वको जिम्मा दिनुपर्छ भन्ने प्रस्टै छ किनभने समयको प्रतिनिधित्व युवाहरूले गरेको हुन्छ ।’

जेनजीको एकताले युवाको शक्ति कस्तो हुन्छ भन्ने कुरा संसारलाई देखाइएको उनले बताएका छन् । युवाहरूको माग नै समयको माग भएको उनले बताएका छन् ।

उनी भन्छन्, ‘अबको समय हामी संयम भएर संसार भरि छरिएर बसेका नेपालीहरू समेत एकजुट भएर हाम्रा अमूल्य भौतिक संरचनाहरूलाई जोगाउने, संरक्षण गर्ने, पुन निर्माण गर्ने र भ्रष्टाचाररहित विधिको शासन पद्धति अपनाउँदै नयाँ नेपाल बनाएर विश्वलाई देखाउने बिन्दुमा आइपुगेका छौँ ।’