सिंहदरबारका भोका कुकुरले पाए आहारा

२९ भदौ, काठमाडौं । सिंहदरबारका भोका कुकुरले आहरा पाएका छन् ।

आइतबार अनलाइनखबरमा ‘खण्डहर सिंहदरबारमा भोकले लखतरान कुकुरहरू’ शीर्षकमा समाचार सम्प्रेषण भएको थियो । भोलिपल्ट कानुन व्यवसायीहरू आहरा लिएर सिंहदरबार पुगेका हुन् ।

‘अनलाइनखबरमा सिंहदरबारमा रहेका कुकुरको समाचार देखेपछि समन्वय गरेर यहाँ आएका छौं,’ सोमबार सिंहदरबारमा कुकुरलाई आहारा दिँदै गर्दा भेटिएका कानुन व्यवसायी सुनिल लम्सालले बताए ।

उनका अनुसार १० जना कानुन व्यवसायीले मिलेर सिंहदरबारका कुकुरका लागि आहारा जुटाएका हुन् । ‘हामी १० जना नै सिंहदरबार आएका छौं,’ उनले भने ।

दिउँसो सवा २ बजेतिर रेडियो नेपाल परिसरमा भेटिएका लम्साल अन्यत्र कुकुरहरू कहाँ छन् भनेर सोधिखोजी गरिरहेका थिए । सिंहदरबारमा चहलपहल बढेसँगै विस्तारै क्यान्टिनहरूसमेत खुल्न थालेका छन् । क्यान्टिन खुलेपछि भने सिंहदरबारका कुकुरले त्यहीँ खाना खान पाउनेछन् ।

स्नेहा श्रेष्ठ लगायतको टोलीले भने यस अगाडिदेखि नै सिंहदरबारका कुकुरलाई खाना खुवाउँदै आएको बताएका छन् ।

अनलाइनखबरमा समाचार सम्प्रेषण भए पनि श्रेष्ठले आफूहरूले २६ भदौदेखि नै सिंहदरबारका कुकुरहरूलाई खाना खुवाउँदै आएको बताएकी थिइन् ।

यही २४ भदौमा सिंहदरबारमा आगजनी भएको थियो । आगलागीले सिंहदरबारका धेरै संरचनामा क्षति भएको छ । क्यान्टिनहरू समेत जलेका छन् । केही दिन सिंहदरबारमा मानिसहरूको चलहलपहल समेत थिएन । त्यो बेला कुकुरहरू आहाराविहीन भएका थिए ।

तर, श्रेष्ठ लगायतले २६ भदौदेखि नै सिंहदरबारका कुकुरहरूलाई खाना खुवाएको बताएका छन् ।

यो पनि पढ्नुहोस

खण्डहर सिंहदरबारमा भोकले लखतरान कुकुरहरू (तस्वीरहरू)