मुलुक फरक मोडमा पुग्यो, कमजोरी सच्याउँदै अगाडि बढौं : मुख्यमन्त्री कँडेल

News Summary

Generated by OK AI. Editorially reviewed.

कर्णाली प्रदेशका मुख्यमन्त्री यामलाल कँडेलले संविधान दिवसमा मुलुकले एकाएक फरक मोड लिएको भन्दै कमी कमजोरी सच्याउँदै अगाडि बढ्नुपर्ने बताएका छन्।
कँडेलले युवा पुस्तामा निराशा बढ्नु र राज्य संयन्त्रप्रति वितृष्णा हुनु गम्भीर विषय भएको उल्लेख गर्दै लोकतन्त्रका पक्षधरलाई सचेत हुन आग्रह गर्नुभएको छ।
मुख्यमन्त्री कँडेलले प्रदेश संरचनाप्रति उठेका टिका–टिप्पणीलाई समयअनुसार सुधार गर्दै राजनीतिक स्थायित्व र आर्थिक समृद्धि तर्फ अघि बढ्नुपर्ने बताउनुभएको छ।

३ असोज, सुर्खेत । कर्णाली प्रदेशका मुख्यमन्त्री यामलाल कँडेलले एकाएक मुलुक फरक मोडमा पुगेकाले कमी कमजोरीहरूलाई सच्याउँदै अगाडि बढ्नु पर्ने बताएका छन् ।

उनले नागरिकका आवश्यकताको संवोधनमा तीनै तहका सरकार प्रयत्नरत भइरहेकै अवस्थामा एकाएक मुलुकले फरक मोड लिन पुगेको बताएका हुन् । संविधान दिवस तथा राष्ट्रिय दिवस, २०८२ को अवसरमा आज शुभकामना सन्देश जारी गर्दै मुख्यमन्त्री कँडेलले सो धारणा सार्वजनिक गरेका हुन् ।

कँडेलले युवा पुस्तामा उत्पन्न निराशालाई बुझ्न र समस्या समाधान गर्न गरिएका पहलहरू पर्याप्त नहुँदा राज्य संयन्त्रप्रति वितृष्णा बढ्नुलाई अन्यथा मान्न नहुने बताएका छन् । ‘यस्ता कमी कमजोरीलाई सच्याउँदै आ–आफ्नो ठाउँबाट सुधारसहित आम नागरिकमा भरोसा बढाउँदै जानुपर्ने वास्तविक यथार्थतालाई हामी सबैले स्विकार्नै पर्दछ’ शुभकामना सन्देशमा भनिएको छ ।

परिवर्तन र शान्तिपूर्ण आन्दोलनका नाममा भएका आगजनी, तोडफोड र विनाशकारी घटनाले सबैलाई स्तब्ध बनाएको मुख्यमन्त्री कँडेलले बताएका छन् । उनले लोकतन्त्र, कानुनी राज्य र विधिको शासनमा कहिल्यै कल्पना समेत गर्न नसकिने घटना भएको बताएका छन् । ‘यो विषयलाई गम्भीरतापूर्वक लिन लोकतन्त्रका पक्षधर सबैलाई म हार्दिक अनुरोध गर्दछु,’ कँडेलले भनेका छन् ।

तीन तहका सरकारले विकास र समृद्धिको लय समाइरहेको अवस्थामा पछिल्लो घटनाक्रमले मुलुकलाई फेरी दशकौं पछाडि धकेल्ने प्रयत्न भएको कँडेलले बताएका छन् । ‘जेन–जी पुस्ताको प्रदर्शनपछि देशैभरि भएका आगजनी, हिंसा र लुटपाटका घटनाका कारण उत्पन्न परिस्थिति पछि यति बेला हामी सबै सामु गम्भीर चुनौती उत्पन्न भएको छ’ सन्देशमा भनिएको छ ।

मुख्यमन्त्री कँडेलले प्रदेश संरचनाप्रति उठेका टिका–टिप्पणीलाई समयको माग अनुसार सुधारात्मक बनाउनु अहिलेको आवश्यकता रहेको बताएका छन् । ‘प्रदेश संरचना संघीयताको पहिचान हो । यसप्रति आएका टिका–टिप्पणीलाई समयअनुसार सुधार गर्दै समन्वय, सहकार्य र सहअस्तित्वमार्फत मुलुकलाई राजनीतिक स्थायित्व र आर्थिक समृद्धिको बाटोतर्फ अघि बढाउनुपर्ने छ,’ उनले भनेका छन् ।

संविधान कानुनी सिद्धान्तमा आधारित राजनीतिक सहमतिको दस्ताबेज भएको र यसले नागरिकका अधिकारलाई सुनिश्चित गरेको विज्ञप्तिमा उल्लेख छ । संविधान दिवसले संविधान प्रदत्त अधिकारप्रति कर्तव्यनिष्ठ र जिम्मेवार बन्न प्रेरणा दिने विश्वास व्यक्त गर्दै मुख्यमन्त्री कँडेलले राष्ट्रिय एकतालाई सुदृढ बनाउन र समृद्धिको दिशामा योगदान गर्न सबैलाई आ–आफ्नो ठाउँबाट अग्रसर हुन आग्रह गरेका छन् ।