२०८२ असोज १५ गते १३:५५ 
News Summary
Generated by OK AI. Editorially reviewed.- नेपाली राष्ट्रिय महिला टिमकी गोलकिपर एन्जिला तुम्बाप्पो सुब्बा भारतीय क्लब सेथु एफसीमा आधा सिजनको लागि सम्झौता गरेकी छिन्।
- एन्जिला यसअघि पनि सेथुबाट खेलिसकेकी छिन् र सन् २०२३–०२४ को सिजनमा टोलीकी कप्तान थिइन्।
- एन्जिलाले हालसम्म देशका लागि ५७ खेल खेलिसकेकी छिन् र सर्वाधिक खेलमा आर्म ब्यान्ड लगाउने खेलाडी हुन्।
१५ असोज, काठमाडौं । नेपाली राष्ट्रिय महिला टिमकी गोलकिपर एन्जिला तुम्बाप्पो सुब्बा भारतीय क्लब सेथु एफसीमा आवद्ध भएकी छिन् ।
क्लब र एन्जिलाबीच आधा सिजनको लागि सम्झौता भएको हो । एन्जिला भारत पुगेर अभ्यास पनि सुरु गरिसकेकी छिन् ।
एन्जिला तेस्रो पटक भारतीय लिग खेल्दैछिन् । यसअघि पनि उनले सेथुबाट खेलेकी हुन् । सन् २०२३–०२४ को सिजनमा भने एन्जिला टोलीको कप्तान नै थिइन् ।
पछिल्लो सिजन भने उनले युरोपेली लिग खेलेकी हुन् । युरोपेली लिग खेल्ने दोस्रो नेपाली खेलाडी बनेकी उनले ग्रीसको निस अट्रोमिटौबाट एक सिजन खेलेकी हुन् ।
यसपटक विभागीय टोली शसस्त्र प्रहरी बलको एपिएफ क्लबबाट एएफसी महिला च्याम्पियन्स लिगको छनोट खेल पनि खेल्न भ्याइन् । तर, ताजकिस्तानमै रहँदा सम्झौता गर्न नपाएपछि उनी आधा सिजनपछि मात्रै युरोपेली लिगको लागि आवद्ध हुने तरखरमा छिन् ।
‘युरोपबाटै खेल्ने अवसर पनि आएको थियो । तर, उज्बेकिस्तानमा हुँदा सम्झौता गर्न पाइन्,’ एन्जिलाले भनिन्, ‘तत्काललाई सेथुबाट भारतीय लिग खेल्छु । मध्यसिजनमा पुनः युरोपेली क्लबसँग नै जोडिन्छु ।’
यसअघि एन्जिलाले पाकिस्तानी टिम मासा युनाइटेडबाट पनि खेलेकी थिइन् ।
एन्जिलाले हालसम्म देशको लागि ५७ खेल खेलिसकेकी छिन् । उनी देशको लागि सर्वाधिक खेलमा आर्म ब्यान्ड लगाउने खेलाडी पनि पर्छिन् ।
नोभेम्बरबाट सुरु हुने भारतीय महिला लिगमा पूर्व विजेता इष्ट बंगालसहित आठ टिम सहभागी हुँदैछन् । भारतीय लिग हालसम्म गोकुलम केरेलाले सर्वाधिक ३ पटक जितेको छ ।
प्रतिक्रिया 4