तीन दिनदेखि माडीमा विद्युत् आपूर्ति बन्द

News Summary

Generated by OK AI. Editorially reviewed.

चितवनको माडी नगरपालिकामा भूमिगत प्रसारण लाइनमा समस्या आएपछि तीन दिनदेखि विद्युत् आपूर्ति बन्द छ।
विद्युत् प्राधिकरणका अनुसार रिउखोलामा पानी जम्दा र निकुञ्जभित्र सडक चौडाइ बनाउँदा तारमा समस्या आएको छ।
मर्मत कार्य जारी छ र आज साँझसम्म विद्युत् आपूर्ति सहज बनाइने प्राधिकरणले जनाएको छ।

२० असोज, चितवन। चितवनको माडी नगरपालिकामा विगत तीन दिनदेखि विद्युत् आपूर्ति बन्द भएको छ ।

भूमिगत प्रसारण लाइनमा समस्या आउँदा शनिबार बिहान २ बजेदेखि माडी नगरपालिकामा विद्युत् आपूर्ति बन्द भएको हो ।

विद्युत् प्राधिकरण वितरण केन्द्र चनौलीका प्रमुख राजकुमार श्रेष्ठका अनुसार भूमिगत विद्युतीकरण गरिएको स्थानमध्ये दुई स्थानमा समस्या आएको हो।

शनिबारदेखि परेको पानीका कारण रिउखोला नजिक राखिएको भूमिगत लाइनमा समस्या आएको छ। उनले भने, ‘पानी धेरै जमेका कारण विद्युत् प्रसारणमा समस्या भयो।’

यस्तै चितवन राष्ट्रिय निकुञ्जभित्र रहेको भूमिगत विद्युतीकरणको तारमा सडकको चौडाइ फराकिलो बनाउने क्रममा उपकरणको ठक्करले समस्या आएको उनले जानकारी दिए ।

उनका अनुसार दुवै स्थानको समस्या समाधान गरेर आज साँझसम्ममा विद्युत् आपूर्तिमा सहज बनाइने छ।

समस्या देखिएको स्थानमा अहिले मर्मतको काम भइरहेको श्रेष्ठले बताए। माडी नगरपालिकामा १२ हजार ग्राहक रहेका छन्।