दशैंको दक्षिणा म्युचुअल फन्डमा गर्न सकिन्छ लगानी, यी हुन् सस्ता योजना

२० असोज, काठमाडौं । तपाईसँग जम्मा १ हजार रुपैयाँ छ भने पनि त्यो रकम म्युचुअल फन्डको इकाइ खरिद गरेर लगानी सुरुवात गर्न सक्नुहुन्छ ।

१ हजार रुपैयाँको लगानीले ठूलो लाभ नमिल्ला, तर लगानीको बानी विकासका लागि पनि म्युचुअल फन्ड उपयुक्त छन् । लगानीको बानी विकासले आउने प्रतिफल, सो सम्पत्तिको मूल्य वृद्धिजस्ता पक्षबारे बुझ्न सघाउ पुग्छ।

म्युचुअल फन्डमा आम सर्वसाधारणलाई लगानी गर्न सजिलो हुन्छ । सेयर बजारबारे धेरै जानकारी नभएकाले पनि यसमा लगानी गरी पर्याप्त लाभ लिन सक्छन् । किनकि म्युचुअल फन्ड सञ्चालन गर्ने योजना व्यवस्थापक कोषमा रहेका आर्थिक विशेषज्ञ, लेखा परीक्षक, आधारभूत तथा प्राविधिक विशेषज्ञहरूले लगानी तथा कारोबारको निर्णय गर्छन् ।

मुक्तिनाथ क्यापिटलका सीईओ कविन्द्र ध्वज जोशीका अनुसार विश्लेषणका क्रममा प्राविधिकभन्दा पनि आधारभुत विषयलाई प्राथमिकता दिइने गरेको छ । केही कम्पनीका सेयर भने म्युचुअल फन्डले पनि कारोबारकै लागि किन्ने गर्छन् । ‘छोटो अवधिको कारोबारका लागि छुट्याइने फन्ड तुलनात्मक रुपमा कम नै हुन्छ’ उनले भने ।

प्रतिइकाइ अंकित मूल्य १० रुपैयाँ हुने म्युचुअल फन्ड कम्तीमा १ सय इकाइ किनेर लगानी सुरुवात गर्न सकिन्छ । हाल बजारमा १० रुपैयाँभन्दा कम मूल्यमा पनि म्युचुअल फन्डका इकाइ खरिद गर्न सकिन्छ ।

म्युचुअल फन्डका इकाइ बिक्री गरेर जम्मा हुने रकम विभिन्न कम्पनीका सेयर, ऋणपत्रजस्ता धितोपत्रमा लगानी हुन्छ । अर्थात् म्युचुअल फन्डले संकलन गरेको रकम विविध क्षेत्रमा लगानी गर्छन् । त्यसरी लगानीबाट आएको नाफा इकाइधनीलाई दिन्छन् ।

तसर्थ म्युचुअल फन्डमा गरेको लगानीबाट बर्सेनि लाभांश पाइन्छ । सेयर बजारले बढ्दो लय लिँदा म्युचुअल फन्डको लाभांश पनि बढी हुने गरेको इतिहास छ । म्युचुअल फन्डले विगतमा एकै वर्ष ५० प्रतिशतसम्म लाभांश दिएको इतिहास छ । म्युचुअल फन्डको संकलित रकममध्ये अधिकांश (८० प्रतिशत हाराहारी) सेयरमा लगानी गर्छन् ।

म्युचुअल फन्ड पनि दुई किसिमका हुन्छन् । बन्दमुखी र खुलामुखी योजना । बन्दमुखी योजना सेयर बजारमा किन्न र बेच्न पाइन्छ । खुलामुखी योजना निश्चित एजेन्ट (तोकिएका बैंक तथा वित्तीय संस्थाका शाखा)बाट मात्रै कारोबार गर्न मिल्छ ।

बजारमा खुलामुखी योजना खरिद बिक्री हुँदैन । सिस्टमेटिक इन्भेस्टमेन्ट प्लान (एसआईपी) गर्नेले यिनै खुलामुखी योजना खरिद गर्ने हो । एसआईपीअन्तर्गत हरेक महिना वा त्रैमासिक रुपमा निश्चित रकम भुक्तानी गर्दा योजनाका युनिट डिम्याट खातामा जम्मा हुँदै जान्छ ।

हाल बजारमा ३९ वटा बन्दमुखी योजना सूचीकृत छन् । अरु १० वटा खुलामुखीसहित कुल ४९ वटा योजना सञ्चालनमा छन् । म्युचुअल फन्डका योजना थपिँदै गर्दा उनीहरुको कुल सम्पत्ति तथा सेयरमा लगानी पनि बढ्दै गएको छ ।

प्रतिइकाइ खुद सम्पत्ति मूल्य (न्याभ) भन्दा बन्दमुखी योजना १५/२० प्रतिशत छुटमा बजारमा किन्न पाइने गरेको छ । यी बन्दमुखी योजनाको परिपक्व अवधि सकिएपछि न्याभ बराबरकै मूल्य पाइन्छ ।

यी हुन् बजारका सस्ता म्युचुअल फन्ड