प्रदेश र जिल्लाका नेताले पुनर्गठनको कुरा उठाएपछि ओलीले भने- जबसम्म सक्छु, छाड्दिनँ

२२ असोज, काठमाडौं । नेकपा एमालेका अध्यक्ष केपी शर्मा ओलीले गत २३ र २४ गते भएको जेनजी आन्दोलनको पृष्ठभूमिमा धेरै असंवैधानिक कार्यहरू भएकाले नआत्तिकन अघि बढ्न आग्रह गरेका छन् ।

सोमबार, मंगलबार र बुधबार विभिन्न प्रदेश र जिल्लाका अध्यक्षहरूसँग भर्चुअल संवादमा जोडिएका ओलीले नेता कार्यकर्तालाई यस्तो आग्रह गरेका हुन् ।

उक्त संवादमा जोडिएका एक नेताका अनुसार, ओलीले पार्टी खरानीको थुप्रोमा रहेको र त्यही थुप्रोबाट अघि बढ्नुपर्ने बताएका थिए ।

‘पार्टी खरानीको थुप्रोमा पुगेको छ । यही थुप्रोबाट हामी माथि उठाउँछौं,’ ओलीले सम्बोधनको क्रममा भनेका भनाइ उद्धृत गर्दै एक नेताले भने, ‘तपाईंहरू नआत्तिकन अघि बढ्नुस् ।’

प्रदेशका नेताहरूसँगको ब्रिफिङका क्रममा ओलीले त्यहाँको अवस्थाबारे ब्रिफिङ लिएका थिए । त्यस्तै, उनले संसद् पुनर्स्थापनाका लागि अघि बढ्नुपर्ने बताउँदै अदालत जाने तयारी भइरहेको बताएका थिए ।

‘संसद् पुनर्स्थापना गराउन अघि बढ्नुपर्छ भनेर भन्नुभयो । त्यसका लागि तयारी भइरहेको पनि उहाँको ब्रिफिङ थियो,’ एक नेताले भने ।

महाधिवेशन गराउन जोड

नेकपा एमाले मोरङ अध्यक्ष अजम्बर राईले पार्टीको नियमित महाधिवेशन गर्नुपर्ने कुरा उठेको बताए । उनीसहित भोजपुर,उदयपुर र धनकुटाका अध्यक्षहरूले पार्टीको नियमित महाधिवेशन माग गरेका हुन् । नेताहरूले मंसिरमा महाधिवेशन गर्नुपर्ने बताएका थिए ।

प्रदेश तथा जिल्लाका नेताहरूले ओलीलाई चाँडोभन्दा चाँढो महाधिवेशन गराउन ध्यानाकर्षण गराएका थिए ।

सो क्रममा ओलीले पार्टी महाधिवेशन हुने र त्यसको निष्कर्ष सबैले स्वीकानुपर्ने बताए । ‘पार्टी महाधिवेशनमा जाने नै हो, जाऔंला, त्यसअघि अहिलेको परिस्थितिसँग सबै एकजुट भएर जुट्नु छ,’ एक जिल्ला अध्यक्षले भने ।

विशेषगरी कोशी प्रदेशका जिल्ला अध्यक्षहरूले पार्टीको महाधिवेशनका लागि जोड गरेका थिए ।

पुनर्गठनको विषय उठेपछि ओलीले भने– ‘जबसम्म सक्छु, छाड्दिनँ’

ब्रिफिङका क्रममा अध्यक्ष ओलीले आफूले सक्ने बेलासम्म कुनै हालतमा शिर नझुकाउने बताएका छन् । ‘कुनै हिसाबले पनि शिर झुक्न दिन्नँ । अडानको हिसाबले, जबसम्म म सक्छु, सक्न छाडेपछि छाडिदिन्छु,’ ओलीले भनेका छन् ।

उनले यो कुरा भन्नुअघि धेरैले पार्टी पुनर्गठनको मुद्दा उठाएका थिए ।

‘पार्टी केही न केही सम्हालिएर अघि बढ्नुपर्छ, पुनर्गठन नै गरेर जानुपर्छ भन्नेतिर छलफल गयो,’ ती नेताले अनलाइनखबसँग भने, ‘त्यसपछि उहाँले आफू सक्ने बेलासम्म नछाड्ने बताउनुभएको हो ।’

ओलीले अहिले पार्टीमा नेता र कार्यकर्तालाई जोड्नेगरी कार्यक्रम बनाउनुपर्ने पनि बताएका थिए ।

‘अहिले यो बेलामा पार्टीमा नेता र कार्यकर्तालाई जोड्नेगरी कार्यक्रम बनाउने बेला भएको छ, नआत्तिकन आ–आफ्नो ठाउँबाट काम गर्नुपर्ने बेला छ,’ ओलीले सम्बोधनको क्रममा राखेको भनाइ उद्धृत गर्दै एक नेताले भने ।

‘सिंहदरबार जलाउनेलाई नेपाली भन्ने कि नभन्ने ?’

ओलीले जेनजी प्रदर्शनका क्रममा अराजक गतिविधिमा विदेशी शक्तिको समेत हात रहेको चर्चा चलिरहेको र यस्ता गतिविधिबारे अझै केही आकलन हेनुपर्ने सम्बोधनको क्रममा बताएका थिए ।

‘विदेशी घुसपैठबाट यी सबै गतिविधि भएका भन्ने आएका छन् । यसका आकलन हेर्नुपर्छ । अहिले जे जे भइरहेका छन् यी सबै असंवैधानिक कार्य भइरहेका छन्,’ ओलीले भनेका थिए ।

उनले सिंहदरबार र सर्वोच्च अदालतमा आगजनी गर्नेलाई नेपाली भन्ने कि नभन्ने ? भन्दै प्रश्न पनि गरेका थिए ।

‘संविधानलाई मिच्ने कुरा भएका छन् । जनताले दु:ख गरेर बनाएको संविधान हो । जेनजीका नाममा धेरै गलत मान्छेले कार्य गरेका छन्,’ ओलीले भनेक थिए, ‘सिंहदरबार जलाउने मान्छेलाई नेपाली भन्ने कि नभन्ने ? अदालतमा आगजनी गर्नेलाई नेपाली भन्ने कि नभन्ने ?’

नेकपा एमाले भोजपुरका अध्यक्ष मक्कर खड्काले राष्ट्रिय महाधिवेशन गर्नुपर्ने आवाज उठाएको बताए ।

‘राष्ट्रिय महाधिवेशन गर्नुपर्छ भन्ने  सबैको सुझाव रह्यो,’ उनले भने, ‘अहिले नेतृत्वको विषयमा कुरा भएन ।’

कोशी प्रदेश अध्यक्ष घनश्याम खतिवडाले जेनजी आन्दोलनअघि नै पार्टीले महाधिवेशन गर्ने पक्षमा उभिएको बताए । यद्यपी छलफलमा महाधिवेशनको विषयमा थप कुरा नभएको बताए ।