तम्घास–सिमिचौर–राङ्गबास–खर्ज्याङ्ग सडक आजदेखि एक महिना बन्द

News Summary

Generated by OK AI. Editorially reviewed.

गुल्मीको तम्घास–सिमिचौर–राङ्गबास–खज्र्याङ्ग सडक असोज २४ देखि कात्तिक २३ गतेसम्म स्तरोन्नतिको लागि बन्द गरिएको छ।
रेसुङ्गा नगरपालिका–१० मैदानदेखि वडा नम्बर ११ जन प्रावि स्कुलसम्मको सडकमा आरसीसी ढलान गरी स्तरोन्नती गरिँदै छ।
सडक बन्द अवधिभर वैकल्पिक सडक प्रयोग गर्न कार्यालयले आग्रह गरेको छ र विभिन्न वैकल्पिक मार्गहरू उपलब्ध गराइएको छ।

२४ असोज, रेसुङ्गा । गुल्मीको तम्घास–सिमिचौर–राङ्गबास–खर्ज्याङ्ग सडक स्तरोन्नतिका लागि आजदेखि एक महिना बन्द गरिएको छ ।

तम्घास–सिमिचौर–राङ्गवास–खर्ज्याङ्ग सडक यही आज असोज २४ देखि कात्तिक २३ गतेसम्म बन्द हुने सडक पूर्वाधार विकास कार्यालय गुल्मीका प्रमुख दिपक खड्काले जानकारी दिए ।

उनका अनुसार रेसुङ्गा नगरपालिका–१० मैदानदेखि वडा नम्बर ११ जन प्रावि स्कुलसम्मको सडकखण्डमा आरसीसी ढलान गरी सडक स्तरोन्नती गरिँदै छ । राजेश्वरी कन्स्ट्रक्सन प्रालिले सडक स्तरोन्नतिको जिम्मा पाएको छ ।

कार्यालयले सडक बन्द हुने अवधिभर वैकल्पिक सडक प्रयोग गर्न आग्रह गरेको छ । विकल्पको रुपमा राङ्गबास फेँदीसम्मका स्थानीय सवारीले मैदान–हर्राबोट–सपौदी र राङ्गबास फेदी सडक प्रयोग गर्न सक्छन् ।

यसैगरी रिडी–पाल्पा अर्घाखाँची तर्फका सवारी साधनले घुम्ती–चारपाला–खर्ज्याङ्ग तथा तम्घास–बलेटक्सार–रिडी वैकल्पिक सडक प्रयोग गर्न सकिने पूर्वाधार विकास कार्यालय गुल्मीका प्रमुख खड्काले जानकारी दिए ।