फिल्म प्रवर्द्धन गर्न पूर्वी नेपालका सहरमा कन्सर्ट गर्दै तक्मे बुढा, राजेशपायल

काठमाडौं । ७ कात्तिकदेखि प्रदर्शनमा आउन लागेको फिल्म ‘मैझारो’ले पूर्वी नेपालका सहरबाट प्रचारप्रसार थालेको छ ।

फिल्म प्रवर्धनको लागि फिल्मले पूर्वका विभिन्न सहरमा सांगीतिक कार्यक्रमको आयोजना गरेको छ । पूर्वका सडकमा गुड्ने विद्युतीय रिक्ससहितका अटो ‘मैझारो’मय भएका छन् ।

हाँस्य कलाकार समेत रहेका निर्देशक विल्सनविक्रम राईले आफ्नो फिल्मलाई दर्शकमाझ पुर्‍याउन कस्सिएर लागिपरेका छन् । उनी आफ्नै सांगीतिक प्रस्तुतिमार्फत दर्शकलाई हँसाउदै सांगीतिक धमाका दिदैछन् ।

उनीसँग गायक राजेशपायल राई, संगीतकार तथा गायक अनमोल गुरुङसहितका कलाकारले प्रस्तुति दिनेछन् । विहिबार धरानमा फिल्मको प्रचारका रुपमा कन्सर्टको आयोजना गरिएको थियो ।

शुक्रबार गृहजिल्लामा निर्देशक राईसहितको टोलीले सांगीतिक प्रस्तुति दिँदैछ । शनिबार विर्तामोडको मुक्ति चोकमा कार्यक्रम भएको छ । दमक, मोरङको बेलबारी, सुनसरीको इटहरी, धरानमा सांगीतिक कार्यक्रमको आयोजना गरिएको छ ।

‘फिल्म मैझारोको व्यापक प्रचारमा लागेका छौँ,’ उनले भने, ‘दर्शकलाई मनोरञ्जनका साथै फिल्म हलमा लाग्न लागेको जानकारी दिनका लागि यो कार्यक्रमको आयोजना गरेका हौँ । यो नौलो तरिका पनि हो ।’

यसअघि यो फिल्मको प्रचारसामाग्री पोस्टर, दुई गीत र टिजर सार्वजनिक भैसकेका छन् ।

निर्देशक राईकै लगानी र पटकथा लेखन रहेको यस फिल्मले मौलिक प्रेम कथालाई चित्रण गर्नेछ । फिल्ममा धीरज मगर, मिरुना मगर, दीया पुन, बुद्धि तामाङ, सुनिल थापा, पुस्कर गुरुङ, अभयराज बराल, माओत्से गुरुङ, कविता आले, रजनी गुरुङ, प्रेम सुब्बा, उदय सुब्बा, अनिल सुब्बा, भूपेन्द्र लिङदेन र विशाल लिम्बुको अभिनय छ ।

‘तक्मे प्रोडक्सन’ को ब्यानरमा फिल्म निर्माण भएको हो ।