इजरायली फेसन डिजाइनरले तयार पारे मिस युनिभर्स नेपालको ‘नेसनल कस्ट्युम’

काठमाडौं । थाइल्याण्डमा हुन लागेको ‘मिस युनिभर्स २०२५’ को प्रतिस्पर्धामा नेपालको ‘नेसनल कस्ट्युम’को डिजाइन विश्वचर्चित फेसन डिजाइनर एभियाड एरिक हर्मनले गर्ने भएका छन् ।

‘मिस युनिभर्स नेपाल’ ले विज्ञप्ति जारी गर्दै हर्मनसँग पोशाक डिजाइनको लागि सहकार्य गरिएको जनाएको छ । पोशाकको थिम ‘शान्तिको हात’ अर्थात ‘ह्यान्ड्स अफ पिस’ राखिएको छ ।

हर्मनले तयार पारेको उक्त पोशाक बैंककमा हुन लागेको फिनालेमा प्रस्तुत हुने जनाइएको छ । नोभेम्बरमा बैंककमा हुने ७४ औं मिस युनिभर्समा नेपालको प्रतिनिधित्व सान्या अधिकारीले गर्नेछिन् ।

२१ नोभेम्बरमा फिनाले हुनेछ । मिस युनिभर्स नेपालकी राष्ट्रिय निर्देशक संगीता पुरीका अनुसार हर्मनले उक्त पोशाक इजरायलमा तयार पारेका थिए ।

नेसनल कस्ट्युमबारे विज्ञप्तिमा भनिएको छ- ‘शान्तिका हातहरू’ शीर्षकको यो उत्कृष्ट डिजाइन नेपालको राष्ट्रिय प्रतीकबाट प्रेरित छ, जुन एकता, समानता र आशाको प्रतीक हो । यो केवल पोशाक मात्र होइन, यो विश्वसँग साझा गरिएको सद्भाव र सम्बन्धको सन्देश हो ।’

केही दिनमा ‘नेसनल कस्ट्युम’ सार्वजनिक हुने जनाइएको छ ।

हर्मनको कुरा गर्दा, उनी अन्तर्राष्ट्रिय स्तरमा प्रशंसित डिजाइनर हुन् । उनले न्यूयोर्क फेसन विक, टीएलभी फेसन विक, कान्स फिल्म फेस्टिभल, र अन्य धेरै ठाउँको लागि पोशाक डिजाइन गरेका छन् ।

उनको डिजाइन ३ पटक ‘मिस युनिभर्स’ मा शीर्ष ५ को ‘नेसनल कस्ट्युम’ मा समावेश भैसकेको छ । उनले १२ भन्दा धेरै मुलुकको राष्ट्रिय पोशाक डिजाइन गरिसकेका छन् ।

‘उनले फेसनलाई कला, कूटनीति र शान्तिको रूपको रूपमा परिभाषित गरिरहेका छन्’ मिस युनिभर्स नेपालले विज्ञप्तिमा भनेको छ । हर्मन इजरायलमा जन्मिएका डिजाइनर हुन् ।

यो पनि पढ्नुहोस

‘मिस युनिभर्स’ मा भाग लिन बैंकक उडिन् सान्या