‘जारी २’ शुक्रबारदेखि : नेपालमा २५८ शोज, विदेशमा १९२ लोकेसनमा रिलिज हुने

काठमाडौं । शुक्रबारदेखि सुरु हुने सप्ताहन्तमा ‘जारी २’ ले ‘वेभ’ ल्याउने देखिएको छ । सुपरहिट फिल्मको दोस्रो श्रृंखला ‘जारी : सङ अफ च्याब्रुङ’ शुक्रबारदेखि नेपालसहित विश्वबजारमा रिलिज हुँदैछ ।

अनलाइनखबरलाई स्वदेश र अन्तर्राष्ट्रिय बजारको रिलिज लोकेसन, शोज संख्याको तालिका प्राप्त भएको छ । जसअनुसार, यो फिल्मले प्राप्त गरेको हल, शोज र लोकेसन निकै महत्वपूर्ण छ ।

नेपालमा शुक्रबार देशब्यापी फिल्मले २५८ शोज प्राप्त गरेको छ । ‘मनबिनाको धन’ ले ७६, ‘जेरी अन टप’ ले ४७, ‘प्रिडेटर : ब्याडल्यान्ड्स’ ले ४२ शोज र ‘द गर्लफ्रेन्ड’ ले ४१ शोज पाएका छन् ।

फिल्मको अन्तर्राष्ट्रिय वितरक सेभेन सिज इन्टरन्यासनलले पनि अन्तर्राष्ट्रिय बजारको विवरण बाहिर ल्याएको छ । जसअनुसार, यो फिल्म विश्वका १९२ लोकेसनमा रिलिज हुँदैछ ।

उत्तर अमेरिकाका ९५ लोकेसन, बेलायतका ३२ लोकेसन, अस्ट्रेलिया- न्यूजिल्याण्डका २२, मध्यपूर्वका ४३ लोकेसनमा फिल्म प्रदर्शन हुने जनाइएको छ ।

फिल्मले अन्तर्राष्ट्रिय बजारमा पहिलो साता कम्तीमा ३,३६० वटा शोज पाएको सेभेन सिजले उल्लेख गरेको छ ।

उपेन्द्र सुब्बा निर्देशित फिल्मले पूर्ववर्ती भागले भन्दा निकै ठूलो परिमाणमा लोकेसन र शोज पाएको देखिन्छ । अब फिल्मसामु प्राप्त शोज र हललाई बलियो ‘वर्ड अफ माउथ’ को मद्दतमा हलसम्म तान्नुपर्ने चुनौती छ ।

विहिबार बेलुका आयोजित प्रिमियरबाट प्राप्त प्रतिक्रिया सकारात्मक देखिन्छ । विशेषगरि, पूर्वी नेपालका हलमा देखिएको एड्भान्स टिकट विक्री पनि लोभलाग्दो छ ।