विवाहको निम्तो पत्र बाँड्दै पूजा, भन्छिन्- सँधैको लागि तयार !

News Summary

Generated by OK AI. Editorially reviewed.

फिल्म निर्मात्री तथा अभिनेत्री पूजा शर्माले २० मंसिरमा युद्ध बानियाँसँग भक्तपुरमा विवाह गर्ने तय भएको छ।
पूजाले सामाजिक सञ्जालमा विवाहका लागि 'सँधैको लागि तयार' रहेको भिडियो सेयर गरेकी छिन्।
पूजाको फिल्म करिअर १३ वर्ष पुरानो छ र उनले १७ फिल्ममा काम गरिसकेकी छिन्।

काठमाडौं । फिल्म निर्मात्री तथा अभिनेत्री पूजा शर्मा विवाह बन्धनमा बाँधिने पक्का भएको छ । केही दिनदेखि उनको विवाहको चर्चा चलिरहेको थियो ।

उनले निकट फिल्मकर्मी र संचारकर्मीलाई पनि विवाहको निम्तो बाँडिरहेकी छिन् । उनको विवाह युद्ध बानियाँसँग हुने बताइएको छ, जो पेशाले रेस्टुरेन्ट व्यवसायी हुन् ।

यी दुईजना लामो समयदेखि प्रेम सम्बन्धमा रहेको मिडिया विवरणहरूमा जनाइएको छ ।

आकर्षक डिजाइनको निम्तो पत्रमा लेखिएको छ, ‘तपाईंलाई युद्ध र पूजाको विवाह समारोहमा हार्दिक स्वागत छ ।’ पत्रमा दुवैजनाको फोटो पनि राखिएको छ ।

निम्तो पत्रअनुसार यी दुईजनाको विवाह २० मंसिरको शनिबार भक्तपुरको एक रिसोर्टमा हुने उल्लेख छ । पूजाले मंगलबार सामाजिक सञ्जालमा एक भिडियो सेयर गर्दै ‘सँधैको लागि तयार’ रहेको क्याप्सन लेखेकी थिइन् ।

पूजाको फिल्म करिअरले आउँदो साता ठीक १३ वर्ष टेक्दैछ । उनको डेब्यू फिल्म ‘थ्री लभर्स’ ७ डिसेम्बर, २०१२ मा रिलिज भएको थियो । ‘रावायण’ सम्म आइपुग्दा उनले १७ फिल्ममा काम गरेकी छन् ।