राजमार्ग विस्तार हुने क्षेत्रमा सडक अतिक्रमण नगर्न विभागले गरायो सचेत

News Summary

Generated by OK AI. Editorially reviewed.

सडक विभागले विस्तारको क्रममा रहेका सडकको सीमा अतिक्रमण नगर्न सरोकारवाला सबैलाई सचेत गराएको छ।
पृथ्वी राजमार्गको मुग्लिन–पोखरा खण्डमा २ लेनको नयाँ सडक र पश्चिम आबुखैरेनीसम्म ४ लेनको सडक निर्माण हुँदैछ।
नारायणघाट–हेटौडा सडक खण्डमा ४ लेन सडक विस्तार, फ्लाइओभर र सर्भिस लेन निर्माण भइरहेको छ र सीमा अतिक्रमण नगर्न भनिएको छ।

२४ मंसिर, काठमाडौं । सडक विभागले विस्तारको क्रममा रहेका सडकको सीमा अतिक्रमण नगर्न सरोकारवाला सबैलाई सचेत गराएको छ ।

सडक विभाग, आयोजना निर्देशनालय (एडीबी)ले एक सूचना जारी गर्दै सडक सीमा अतिक्रमण नगर्न भनेको हो । खासगरी पृथ्वी राजमार्गको मुग्लिन–पोखरा खण्डमा मुग्लिन बजारदेखि त्रिशुली जलविद्युत् आयोजनाभन्दा पश्चिम नदीपारि गोरखातर्फ २ लेनको नयाँ सडक निर्माणको योजना रहेको छ ।

साथै पश्चिम आबुखैरेनीसम्म भने अहिलेको राजमार्गलाई चौडा गरी ४ लेनको सडक बनाउन लागिएको छ । यस सडकमा सीमा अतिक्रमण नगर्न विभागले भनेको छ ।

अर्कोतर्फ, महेन्द्र राजमार्ग अन्तर्गत नारायणघाट–हेटौडा सडक खण्डको गोन्द्राङ–टिकौली जंगलमा २ किलोमिटर फ्लाइओभरसहित राप्ती नदी पुलसम्म खुला सडक विस्तार गरिँदैछ । यहाँ खुला र जंगल क्षेत्रमा ४ लेन तथा बसोबास भएका स्थानमा थप १/१ सर्भिस लेन विस्तार गरिँदैछ ।

शहरी क्षेत्रमा २/२ सर्भिन लेन, ड्रेन, फूटपाथ तथा पैदलयात्रु हिँड्ने पुल र सवारी साधन वारपार गर्ने पुलसहित स्तरोन्नति गरिँदैछ । यी सडकमा सीमा अतिक्रमण गरी घर टहरा र संरचना नबनाउन सडक विभागले सचेत गराएको छ ।

साथै सडकको सहज निर्माणका लागि विद्युत् पोल, ढल, खानेपानी र सार्वजनिक संरचना स्थानान्तरणका लागि समेत सडक विभागले आह्वान गरेको छ ।