कीर्तिपुर डाँडामा ल्यापटप बोकेर ३ लाख कमाउन सकिने गगनको भनाइमा अर्थमन्त्री सहमत

News Summary

Generated by OK AI. Editorially reviewed.

अर्थमन्त्री रामेश्वर खनालले विदेशी लगानी सहजीकरण गर्न नेपाल राष्ट्र बैंकले विदेशी लगानी तथा विदेशी ऋण व्यवस्थापन विनियमावलीमा परिवर्तन गरेको जानकारी दिए।
खनालले युवाले रिमोट वर्करका रूपमा काम गरिरहेको र त्यसलाई समर्थन गर्नुपर्ने आवश्यकता रहेको भन्दै सरकार प्रयासरत रहेको बताए।
उनले लगानीकर्ताले लाभांश लैजान सहज बनाउने गरी नियम ल्याइएको र वाणिज्य बैंकलाई जिम्मेवार बनाएर लाभांश विदेश लैजान सहजीकरण गरिएको खुलाए।

१५ पुस, काठमाडौं । केही समयअघि नेपाली कांग्रेस महामन्त्री गगन थापाले अभिव्यक्त गरेको भनाइमा अर्थमन्त्री रामेश्वर खनालले सहमति जनाएका छन् ।

फर्मर प्लानर फोरम नेपालले आयोजना गरेको छलफलमा अर्थमन्त्री खनालले विदेशी लगानी सहजीकरण गर्न नेपाल राष्ट्र बैंकले विदेशी लगानी तथा विदेशी ऋण व्यवस्थापन विनियमावलीमा परिवर्तन गरेको जानकारी दिए ।

सोही सन्दर्भमा खनालले गगन थापाको अभिव्यक्ति समेत स्मरण गरे । नेपालमा युवाले रिमोट वर्करका रूपमा काम गरिरहेको र त्यसलाई समर्थन गर्नुपर्ने आवश्यकता रहेको भन्दै उनले सरकार सोही अनुसार प्रयासरत रहेको बताए ।

८/९ वर्ष अगाडि ५ सय बराबरको डलर कार्ड सुविधा दिँदा रिमोट वर्करलाई धेरै सहज भएको भन्दै उनले सोही आधारमा विदेशी लगानीकर्ताले लाभांश लैजान सहज बनाउने गरी नियम ल्याइएको जानकारी दिए ।

लगानीकर्ता डराउने अवस्थाले थप लगानी नआउने भन्दै उनले वाणिज्य बैंकलाई जिम्मेवार बनाएर नियम अनुसार लैजान सक्ने लाभांश विदेश लैजान सहजीकरण गरिएको बताए ।

अहिले काठमाडौंमा खुलेको धेरै चिया पसलमा धेरै युवाले यस्तै रिमोट वर्करका रूपमा काम गरिरहेको समेत उनले बताए ।

‘कतिपयलाई लाग्छ, यो कस्तो लफङ्गो रहेछ, तर उसले त्यहाँ बसेर विदेशी कम्पनीमा काम गरिरहेको हुन्छ,’ उनले भने । विगतमा युवाका यस्ता माग कसैले नबुझ्दा समस्या आएको अर्थमन्त्री खनालको भनाइ थियो ।