डिस्कभरको सहकार्यपछि नेपाल पे कार्ड स्किम विदेशमा पनि स्वीकार्य

News Summary

Generated by OK AI. Editorially reviewed.

नेपाल क्लियरिङ हाउस लिमिटेडले डिस्कभर नेटवर्कसँग सहकार्यमा नेपालको नेसनल कार्ड स्किम 'नेपाल पे कार्ड' को व्यावसायिक प्रयोग सुरु गरेको छ।
नेपाल पे कार्ड विश्वभरिका १ सय ९० भन्दा बढी देश तथा क्षेत्रमा एटीएम र पीओएस टर्मिनलमा प्रयोग गर्न सकिने भएको छ।
हालसम्म ३४ भन्दा बढी बैंक तथा वित्तीय संस्थाले नेसनल कार्ड स्विच र नेपाल पे कार्डको प्रिन्सिपल सदस्यताका लागि सम्झौता गरिसकेका छन्।

१६ पुस, काठमाडौं । नेपाल क्लियरिङ हाउस लिमिटेडले डिस्कभर नेटवर्कसँगको सहकार्यमा नेपालको नेसनल कार्ड स्किम ‘नेपाल पे कार्ड’ को व्यावसायिक प्रयोग सुरु गरेको छ ।

नेसनल पेमेन्ट स्विच परियोजना अन्तर्गत नेसनल कार्ड स्विच र नेपाल पे कार्ड पूर्णरूपमा सञ्चालनमा ल्याइएको हो ।

यो सहकार्यले बैंक तथा वित्तीय संस्था, भुक्तानी सेवा प्रदायक र भुक्तानी प्रणाली सञ्चालकले जारी गर्ने नेपाल पे कार्ड नेपालभरिका एटीएम र पीओएस टर्मिनल मात्र नभई विश्वव्यापी प्रयोग गर्न सकिने भएको छ ।

विश्वभरिका १ सय ९० भन्दा बढी देश तथा क्षेत्रमा उक्त कार्ड प्रयोग गर्न सकिने भएको छ । नेपालका मर्चेन्टहरूले ३० भन्दा बढी नेटवर्क अलायन्स तथा डिनर क्लब कार्डमा आबद्ध विश्वभरिका ३७ करोड ८० लाखभन्दा बढी कार्डबाट भुक्तानी प्राप्त गर्न सक्नेछन् ।

हालसम्म ३४ भन्दा बढी बैंक तथा वित्तीय संस्थाले नेसनल कार्ड स्विच र नेपाल पेको प्रिन्सिपल सदस्यताका लागि सम्झौता गरिसकेका छन् ।

अन्य संस्था पनि क्रमश: थपिने क्रममा रहेको क्लियरिङ हाउसले जनाएको छ । एनपीएस तथा एनसीएसमा कार्डसम्बन्धी कारोबारको अन्तरआबद्धता साथै राउटिङ, सेटलमेन्ट, डिस्प्युट ह्यान्डलिङ तथा एकीकृत रिपोर्टिङ जस्ता विशेषता छन् ।