युवाहरूलाई हतोत्साहित नहुन भन्दै सुहाङले भने– एक पाइला चालेको मात्रै हुँ

News Summary

Generated by OK AI. Editorially reviewed.

नेकपा एमालेका युवा नेता सुहाङ नेम्वाङले पार्टीका शुभचिन्तक र युवा पंक्तिलाई हतोत्साहित नहुन आग्रह गर्नुभएको छ।
नेम्वाङले संसदीय दलको नेतामा दावी गर्नुभएको थियो तर अन्तिम समयमा समर्थकले साथ नदिएपछि हतोत्साहित नहुन आग्रह गर्नुभएको हो।
नेम्वाङले एमालेलाई अझ सुदृढ बनाउँदै देशलाई समृद्धितिर लैजाने विश्वास व्यक्त गर्नुभएको छ।

१८ चैत, काठमाडौ । नेकपा एमालेका युवा नेता सुहाङ नेम्वाङले पार्टीका शुचेच्छुक र युवा पंक्तिलाई हतोत्साहित नहुन आग्रह गरेका छन् ।

नेम्वाङले संसदीय दलको नेतामा दावी गरेका थिए । तर प्रस्तावक र समर्थक रहने आश्वासन दिएका सांसदहरुले समेत अन्तिम समयमा साथ नदिएपछि नेम्वाङले समर्थकहरुलाई हतोत्साहित नहुन आग्रह गरे ।

‘एमालेमा रहेको अलिअलि कमजोरीलाई सुधार्दै हिजो के भएको भन्नेमा आत्मलोचना, वर्तमान अवस्थामा कहाँ उभिएका छौ र भविष्यमा नेकपा एमाले अझै सुदृढ भएर अगाडि बढ्छ भन्ने विश्वासमा मैले एउटा पाइला चालेको हो,’ पत्रकारहरुसँग नेम्वाङले भने, ‘त्यो पाइला चाल्दा कहिलेकाही अपेक्षित नतिजा नआउन सक्छ । तर त्यसका कारणले हामी हतोत्साहित हुनुहुँदैन । एमालेका शुभचिन्तक र युवा पुस्ताले पनि हतोत्साहित हुनुहुँदैन ।’

नेम्वाङले आगामी दिनमा थप कदम चाल्दै जाने विश्वास पनि दिलाए । ‘एमालेले देशलाई समृद्धितिर लान्छ । संयम र सभ्य तरिकाले देश र जनताको पक्षमा कुरा उठाइरहन्छ । मैले यो एक पाइला मात्रै चालेको, अब चाल्दै गर्छु,’ उनले भने ।