बर्सेनि पाठ्यक्रम परिवर्तन हुँदा अभिभावक मारमा परे : सांसद पाठक

News Summary

Generated by OK AI. Editorially reviewed.

रास्वपका सांसद प्रकाश पाठकले पब्लिकेसनको कमिसनले बर्सेनि पाठ्यक्रम परिवर्तन हुँदा अभिभावक मारमा पर्ने बताएका छन्।
उनले भने, \'पाठ्यपुस्कका नाममा देशभरका झन्डै २४ लाख विद्यार्थीका अभिभावकले औसत ५ हजार रुपैयाँ खर्च गर्ने गरेका छन्।\'
सांसद पाठकले सामुदायिक र निजी विद्यालयबीचको पोशाक र पाठ्यक्रम अन्तरले शिक्षा प्रणालीमा ठूलो विभेद देखिएको उल्लेख गरे।

२५ चैत, काठमाडौं । रास्वपका सांसद प्रकाश पाठकले पब्लिकेसनको कमिसनले बर्सेनि पाठ्यक्रम परिवर्तन हुँदा अभिभावक मारमा पर्ने गरेको बताएका छन् ।

संसद्‍को शून्य समयमा बोल्दै सांसद पाठकले पाठ्यपुस्कका नाममा अभिभावक मारमा पर्ने गरेको बताएका हुन् ।

‘भर्ना शुल्क नलिन शिक्षा मन्त्रालयले निर्णय गरिसके पनि, पाठ्यपुस्कका नाममा देशभरका झन्डै २४ लाख विद्यार्थीका अभिभावकको औसत ५ हजार रुपैयाँका दरले ११ अर्ब ८४ करोड रकम खर्च हुने गरेको छ । पब्लिकेसनको कमिसनका कारण बर्सेनि पाठ्यक्रम परिवर्तन हुँदा त्यसको प्रत्यक्ष मार अभिभावकहरुमा पर्ने गरेको छ,’ उनले भने ।

पोषाक र पाठ्यक्रममा सामुदायिक र निजी विद्यालय बीचको अन्तरले नेपालको शिक्षा प्रणालीमै ठूलो विभेद देखिएको उनले बताए ।

‘यसलाई सदाका लागि अन्त्य गर्न अन्तरास्ट्रिय स्तरमा प्रतिस्पर्धा गर्नसक्ने एकै मापदण्डका पाठ्यपुस्तक निजी र सामुदायिक विद्यालयमा समावेश गर्न तथा सबै विद्यालयहरूमा एकै पोशाक कायम राखी शैक्षिक विभेद हटाउन सभामुख मार्फत सरकारको ध्यानाकर्षण गराउँछु,’ उनले भने ।