अजित मिजार हत्या प्रकरण- पुनः फरेन्सिक परीक्षण गर्न मन्त्री र सांसदसँग परिवारको माग

२२ साउन, काठमाडौँ। अन्तरजातीय विवाह गरेकै कारण हत्या गरिएका काभ्रेका अजीत मिजारको परिवारले न्यायको याचनासहितमन्त्री र सांसदसँग भेट गरेका छन् ।

१० बर्षदेखि न्यायको खोजीमा रहेको मिजार परिवारले महिला, बालबालिका, लैङ्गिक तथा यौनिक अल्पसंख्यकमन्त्री सीता बादी र सत्तारुढ रास्वपाका सचेतक प्रकाशचन्द्र परियारलाई भेटेको हो ।

अजितका बुबा हरिभक्त र आमा कालीले बादी र परियारलाई भेटेर पुन: फरेन्सिक परीक्षणको माग गरे । अन्तरजातीय विवाहको विषयलाई लिएर २०७३ सालमा अजितको रहस्यमय हत्या भएको थियो। अजितको शव अहिले पनि त्रिवि शिक्षण अस्पताल महाराजगञ्जमा राखिएको छ।

न्याय नपाएसम्म शव नबुझ्ने अडानमा रहेका मिजार दम्पतीले शुक्रबार​मन्त्रालयमा भएको छलफलका क्रममा नयाँ सरकारले न्याय दिलाउने आशा रहेको सुनाए। उनीहरूले घटनाको सत्यतथ्य बाहिर ल्याउन र निष्पक्ष छानबिन सुनिश्चित गर्न तथा अजितको शवको फरेन्सिक (विधि विज्ञान) परीक्षणको व्यवस्था मिलाइदिन माग राखे।

सो क्रममा मन्त्री सीता बादी र सचेतक प्रकाशचन्द्र परियारले मिजार परिवारको पीडाप्रति पूर्ण सहानुभूति प्रकट गर्दै न्याय दिलाउने प्रक्रियामा राज्यका तर्फबाट आवश्यक सहयोग र पहल गर्ने आश्वासन दिएका छन्।

काभ्रेका अजितको शव धादिङको गजुरी गाउँपालिकास्थित ठाँटीमा फेला परेको थियो। प्रहरीले परिवारलाई जानकारी नै नदिई शव उठाएर गाडेको थियो। पछि परिवार र अधिकारकर्मीको दबाबपछि शव उधिनेर पोष्टमार्टम गरिएको थियो। अजित हत्याको विषयमा जिल्ला, उच्च हुँदै सर्वोच्च अदालतसम्म पुगिसकेको छ।

तर प्रहरीकै मिलेमतो र प्रमाण संकलनमा कमजोरीका कारण आरोपितहरूले सफाइ पाएका छन्।