एक लाख भूटानी शरणार्थी तेस्रो मुलुकमा

२४ साउन, काठमाडौं । गत आठ वर्षको अवधिमा नेपालबाट झन्डै एक लाख भुटानी शरणार्थी तेस्रो मुलुक गएका छन् ।

तेस्रो देशमा पुनर्वास कार्यक्रम अन्तर्गत सन् २००७ सेप्टेम्बरदेखि हालसम्म ९८ हजार ३६ जना भुटानी शरणार्थी विभिन्न आठ मुलुकतर्फ गएको नेपालस्थित संयुक्त राष्ट्रसंघीय शरणार्थीसम्बन्धी उच्चायुक्तको कार्यलय (यूएनएचसीआर) ले जनाएको अन्नपूर्ण पोस्टमा खबर छ ।

यूएनएचसीआरले परराष्ट्र मन्त्रालयलाई हालै लेखेको पत्रअनुसार तेस्रो देशमा पुनर्वास गरिएकामध्ये ४८ हजार ६ सय ४३ जना महिला छन् भने ४९ हजार तीन सय ९३ जना पुरुष छन् । परराष्ट्रका अनुसार हाल सबैभन्दा धेरै ८३ हजार ५३ जना भुटानी शरणार्थी पुर्नवास कार्यक्रम अन्तर्गत अमेरिका गएका छन ।

त्यसमध्ये ६ हजार ३५ जना क्यानडा, पाँच हजार पाँच सय १२ जना अस्ट्रेलिया, पाँच सय ६६ जना नर्वे, नौ सय ९० जना न्युजिल्यान्ड, तीन सय २७ जना नेदरल्यान्डस् तथा तीन सय ५८ जना बेलायत र आठ सय ७४ जना डेनमार्क गएका छन् ।